म्याग्दी, पुस २१ ।
म्याग्दीको बेनी नगरपालिका कार्यालयले आगामी आर्थिक वर्ष २०७४–७५ मा सञ्चालन गर्ने विकास योजना तथा कार्यक्रमहरूका लागि रु. साढे सात करोडभन्दा बढीको बजेट प्रस्ताव गरेको छ ।

आज सम्पन्न चौथो नगरपरिषद्बाट रु. सात करोड ६८ लाख २३ हजार रुपैयाँ बजेटसहित आगामी आर्थिक वर्षको नीति योजना तथा कार्यक्रमहरू सार्वजनिक गरिएको हो ।

पूँजीगततर्फ रु. छ करोड पाँच लाख अठासी हजार र चालुतर्फ रु. एक करोड ६२ लाख ३५ हजार बराबरको बजेट नगरपालिकाका कार्यकारी अधिकृत छबिलाल सुवेदीले प्रस्ताव गरेका छन् ।

बेनी नगरपालिकाले आगामी आर्थिक वर्षमा फोहोर व्यवस्थापनका लागि अहिलेको ल्याण्डफिल साइटलाई व्यवस्थित गरी अन्यत्रै स्थानान्तरण गर्ने, नगर क्षेत्रका धार्मिक तथा सांस्कृतिक र पर्यटकीय क्षेत्रहरूको विकास गर्ने, सडक गुरुयोजना तयार गर्ने, कृषि, पशुपालन, शिक्षा, स्वास्थ्य, आमसञ्चार, सडक, खानेपानी, पर्यटन प्रबर्दनलगायतका योजनालाई प्राथमिकता दिएको छ ।

परिषद्को आज स्थानीय विकास राज्यमन्त्री श्रीप्रसाद जबेगुले उद्घाटन गर्दै मुलुकलाई समृद्धितर्फ अगाडि बढाउनुपर्नेमा जाेडसमेत दिए । मन्त्री जबेगुले प्रचुर सम्भावनाले भरिपूर्ण नेपालको विकासको लागि मुलुकलाई समृद्धितर्फ लैजान आवश्यक रहेकोमा जोड दिएका छन्।

उनले मुलुकमा लामो समयपछि अधिकार प्राप्तिको लागि राजनीतिक परिवर्तन भएको उल्लेख गर्दै अबको समय देशलाई विकास निर्माणमा तीब्रता दिएर मुलुकलाई विकसित मुलुक बनाउनुपर्ने आवश्यकता औँल्याए ।