काठमाडाैं, माघ १४ ।
जारी रहेकाे इटालियन सिरी ‘ए’ मा युभेन्टसको अपराजित यात्रा कायमै रहेको छ । गएराति भएको प्रतिस्पर्धात्मक खेलमा युभेन्टसले लाजियोलाई २-१ गोल अन्तरले पराजित गरेको छ ।

युभेन्टसलाई जिताउन जाओ कान्सेलो र क्रिस्टियानो रोनाल्डोले एक एक गोल गरेका छन् भने लाजियोका लागि युभेन्टसकै इमरे क्यानले आत्मघाती गोल गर्न पुगेका थिए ।

पहिलो हाफमा अत्यन्तै खराब खेल प्रस्तुत गरेकाे युभेन्टसले पहिलो हाफमा गोलका लागि कुनै सट प्रहार गर्न सकेन । दोस्रो हाफको ५९ औँ मिनेटमा आत्मघाती गोलबाट लाजियोले अग्रता कायम गरेपछि युभेन्टस दबाबमा आएको थियो । तर, खेलको ७४ औँ मिनेटमा सब्स्टिच्युटको रूपमा मैदानमा आएका कान्सेलोएल गोल गर्दै युभेन्टसलाई खेलमा फर्काएका थिए ।

त्यसपछि खेलको ८० औँ मिनेटमा युभेन्टसले पाएको पेनाल्टीलाई गोलमा परिणत गर्दै रोनाल्डोले जित दिलाएका थिए । याेसँगै रोनाल्डोको यस सिजनको सिरी ‘ए’ मा १५ औँ गोल भएकाे छ ।

जितसँगै युभेन्टस यस सिजनको सिरी ‘ए’ मा लगातार २१ खेलमा अपराजित यात्रा कायमै रहेकाे छ । युभेन्टसको २१ खेलमा ५९ अंक रहेको छ भने दोश्राे स्थानमा रहेको नापोलीभन्दा ११ अंकले अगाडि रहेको छ ।