काठमाडौं, फागुन १६ ।
जारी रहेको इङ्गलिस प्रिमियर लिग फुटबलअन्तर्गत गएराति भएको खेलमा लिभरपुलले वाट्फोर्डलाई ५ विरुद्ध शून्य गोल अन्तरले पराजित गर्दै शीर्ष स्थानमा रहेको लिभरपुलले फराकिलो जितसमेत दर्ता गर्न सफल भएको छ । घरेलु मैदानमा लिभरपुललाई जित दिलाउन साडियो माने र भिर्गिल भान डिज्कले २–२ गोल गरेका थिए भने डिभोक ओरिगीले थप एक गोल गरेका थिए ।

वाट्फोर्डविरुद्ध लिभरपुलले खेलको नवौँ मिनेटमा मानेको गोलबाट अग्रता बनाएको थियो । २० औँ मिनेटमा मानेले व्यक्तिगत दोश्रो गोल गर्दै लिभरपुललाई २ विरुद्ध शून्य गोलले अग्रता दिलाएका हुन् । पहिलो हाफसम्म २ विरुद्ध शून्य गोलले अगाडि रहेको लिभरपुलले दोश्रो हाफमा थप ३ गोल गर्यो । खेलको ६६ औँ मिनेटमा ओरिगीले गोल गर्दै लिभरपुलको अग्रता ३ विरुद्ध शून्य गोल बनाए ।

खेलको ७९ औँ मिनेटमा डिज्कले गोल गर्दा लिभरपुलको अग्रता ४ विरुद्ध शून्य गोल हुन पुग्यो । त्यसपछि खेलको ८२ औँ मिनेटमा डिज्कले व्यक्तिगत दोश्रो गोल गर्दै लिभरपुललाई ५ विरुद्ध शून्य गोलले जित दिलाए । जितसँगै लिभरपुलले लिगमा शीर्ष स्थानको अग्रता कायमै राख्न सफल भएको छ । लिभरपुलले २८ खेलबाट ६९ अंक जोडेको छ । र, लिभरपुल दोश्रो स्थानको म्यानचेस्टर सिटीभन्दा १ अंकले अघि रहेको छ । सिटीको ६८ अंक रहेको छ । पराजित वाट्फोर्ड ४० अंक जोडेर लिगको आठौँ स्थानमा रहेको छ ।