काठमाडाैं, असार १८ ।
जारी रहेकाे महिला विश्वकप फुटबलअन्तर्गत आज बिहान भएकाे खेलमा इङ्गल्याण्डलाई २–१ गाेलले पराजित गर्दै अमेरिका फाइनलमा प्रवेश गर्न सफल भएकाे छ ।

प्रतिस्पर्धात्मक उक्त खेलमा दुबै टोलीले पहिलो हाफमा नै गोल गरेका थिए । अमेरिकाले १० औँ मिनेटमा क्रिस्टियन प्रेसको गोलबाट अग्रता लिएको थियो । तर, अमेरिकाको अग्रता लामो समय टिक्न सकेन । १९ औँ मिनेटमा इङ्गल्याण्डकी इलेन ह्वाइटले गोल गर्दै खेललाई बराबरीमा ल्याइन् । उनले बेथानी मिडको पासमा गोल गरेकी थिइन् । ३१ औँ मिनेटमा एलेक्स मोगार्नले गोल गर्दै अमेरिकालाई २–१ गाेलले अग्रता दिलाइन् ।

दोश्राे हाफमा पनि दुबै टोलीले लगातार गोल गर्ने निकै राम्रा अवसर बनाए तापनि गोल भने हुन सकेन । इङ्गल्याण्डले ६७ औँ मिनेटमा गरेको गोललाई भीएआरको सहायतामा अफसाइड दिइएको थियो । त्यसपछि इङ्गल्याण्डले ८४ औँ मिनेटमा पेनाल्टीको अवसर खेर फाल्न पुगेकाे थियो । इङ्गल्याण्डकी स्टेफनी होउटन पेनाल्टीमा चुकेकी थिइन् । उनको प्रहारलाई अमेरिकी गोलरक्षक अलयासा नेइहरले बचाउन सफल भएकी थिइन् ।

अमेरिकाकी विकीले डिबक्सभित्र विपक्षी खेलाडीलाई लडाएपछि इङ्गल्याण्डले पेनाल्टी प्राप्त गरेकाे थियो । खेल सकिन पाँच मिनेट मात्र बाँकी छँदा मिली ब्राइट रातो कार्ड खाँदै बाहिरिएपछि इङ्गल्याण्ड १० खेलाडीमा समेटिन पुगेकाे थियो । त्यसपछि कमजोर बनेको इङ्गल्याण्डमाथि हाबी भएको अमेरिका फाइनलमा पुग्न सफल भयो । उपाधिका लागि अमेरिकाले नेदरल्याण्डस् र स्वीडेनबीचको बिजेतासँग प्रतिस्पर्धा गर्नेछ । दोश्राे सेमिफाइनल खेल स्थानीय समयअनुसार भाेलि बिहीबार बिहान हुनेछ ।