काठमाडाैं, असार २३ ।
जारी रहेकाे एसीसी यू–१९ इस्टर्न रिजन क्रिकेट प्रतियोगिताअन्तर्गत नेपाल फाइनलमा प्रवेश गरेको छ । आज घरेलु टोली मलेशियालाई ७ विकेटले पराजित गर्दै नेपाल फाइनलमा प्रवेश गरेको हो । मलेशियाले दिएको ८८ रनको सामान्य लक्ष्य नेपालले १५ दशलमव ५ ओभरमा ३ विकेट गुमाएर पूरा गरेकाे हाे ।

नेपालका लागि कप्तान रोहितकुमार पौडेलले ३१ र भिम सार्कीले नट आउट ३३ रन बनाएका थिए । यस्तै, पवन सराफ १८, रित गौतम ३ र खडक बोहरा शून्य रनमा आउट भए । बलिङमा मलेशियाका लागि मोम्मद खैरले २ र मोम्मद आमिरले १ विकेट लिएका हुन् ।

यसअघि टस हारेर ब्याटिङको निम्ताे पाएको मलेशियाले ४० दशमलव ५ ओभरमा सम्पूर्ण विकेट गुमाएर ८७ रन बनाएकाे थियाे । उसका लागि मोहम्मद आमिरले सर्वाधिक २४ रन बनाए । बलिङमा नेपालका सागर ढकालले ३, कुशल मल्लले २, कमलसिंह ऐरी, तिलक भण्डारी र राशिद खानले एक–एक विकेट लिएका थिए । नेपालले उपाधिको लागि भाेलि मंगलबार सिङ्गापुर वा हङकङ मध्य एकसँग प्रतिस्पर्धा गर्नेछ । सिङ्गापुर र हङकङबीचको सेमिफाइनल जारी रहेकाे छ ।