काठमाडाैं, असार २४ ।
मलेशियामा आज सम्पन्न एसीसी यू–१९ इस्टर्न रिजन क्रिकेट प्रतियोगिताको उपाधि नेपालले हात पारेको छ । हकङकङलाई ६ विकेटले हराउँदै नेपालले एसीसी यू–१९ इस्टर्न रिजन क्रिकेट प्रतियोगिताको उपाधि जित्न सफल भएकाे हो । जितसँगै नेपाल श्रीलङ्कामा हुने एसीसी यू–१९ एशिया कपमा स्थान बनाउन सफल भएको छ ।

कङकङले आज दिएको ९६ रनको झिनो लक्ष्य नेपालले १६ दशमलव १ ओभरमा ४ विकेटकाे क्षतिमा पूरा गरेकाे हाे । नेपालको जितमा पवन सराफले ३९, रित गौतमले १३, खडक बोहराले ८, कप्तान रोहित पौडेलले १२ र भीम सार्की ८ रनमा नटआउट रहेका थिए ।

बलिङमा कङकङका रौनक कपुरले २, मोहम्मद हसन र मोहम्मद हसन खानले एक–एक विकेट लिए । यसअघि किनरारा ओभल मैदानमा टस हारेर ब्याटिङको मौका पाएका हङकङले ४३ दशमलव १ ओभरमा सम्पूर्ण विकेट गुमाउँदै ९५ रन बनायो । उसका लागि अदित गोरोवाराले सर्वाधिक २४, कलहान चल्लाले १९ रन बनाउनुबाहेक अन्यले सन्तोषजनक प्रदर्शन गर्न सकेन । बलिङमा नेपालका सागर ढकालले ५, कमलसिंह ऐरीले ३, कुशल मल्ल र तिलकसिंह भण्डारीले एक–एक विकेट लिएका थिए ।