काठमाडौं, श्रावण १२ ।
आईसीसी टी–ट्वेन्टी विश्वकप क्रिकेट एशियाली छनोटको अन्तिम खेलमा नेपाल सिङ्गापुरसँग ८२ रनले पराजित भएको छ ।

इण्डियन एशोसिएशन क्रिकेट मैदानमा सिङ्गापुरले दिएको १९२ रनको फराकिलो लक्ष्य पछ्याएको नेपाल १५ ओभरमा अलआउट हुँदै १०९ रनमा समेटिएको थियो ।

नेपालका लागि ओपनर कप्तान पारस खड्का १२ रन बनाएर आउट भए भने उपकप्तान ज्ञानेन्द्र मल्लले ३९ रन बनाएका थिए । नेपालको पालीमा दिपेन्द्रसिंह ऐरीले २३ रन जोड्दा सोमपाल कामीले ११ रन बनाए भने शरद भेषवाकर ७ रनमा आउट भएका थिए ।

नेपाललाई सस्तैमा समेट्न सिङ्गापुरका सिलाडोरे विजयकुमारले २५ रन खर्चेर ४ विकेट लिए । यस्तै भिनोद भाष्करणले २ विकेट लिए ।

आजको खेलमा हार व्यहोरेसँगै अष्ट्रेलियामा अर्को वर्ष आयोजना हुने टी–ट्वेन्टी विश्वकप खेल्ने नेपालको सपना समाप्त भएको छ ।