मनसुनी वायुकाे प्रभाव कायम रहँदा देशका विभिन्न स्थानमा हल्का वर्षा

काठमाडाैं, असाेज २२ ।
मनसुनी र पश्चिमी वायुको प्रभाव कायमै रहँदा देशका विभिन्न स्थानहरूमा हल्का वर्षा हुने जल तथा मौसम विज्ञान विभागले जनाएको छ । विभागकाअनुसार कोशी, मधेश, वागमती, गण्डकी र लुम्बिनी प्रदेशमा मनसुनी वायुको प्रभाव रहेको छ । साथै कर्णाली प्रदेश र सुदूरपश्चिम प्रदेशमा पश्चिमी वायुको प्रभाव रहेको छ ।
अहिले देशका पहाडी भू-भागमा आंशिक बदली रहेको छ । साथै कोशी प्रदेश र वागमती प्रदेशका एकाध स्थानमा हल्का वर्षा भइरहेको विभागले जनाएको छ ।
विभागकाअनुसार आज मंगलबार दिउँसो कोशी, मधेश, वागमती, गण्डकी प्रदेशमा आंशिकदेखि साधारणतया बदली रही बाँकी भू-भागमा आंशिक बदलीदेखि मौसम मुख्यतया सफा रहनेछ ।
कोशी, मधेश, वागमती, गण्डकीका थोरै स्थानमा तथा बाँकी प्रदेशका पहाडी भू-भागका एक/दुई स्थानमा चट्याङसहित हल्कादेखि मध्यम वर्षाको सम्भावना रहेको छ ।
राति कोशी, मधेश, वागमती र गण्डकी प्रदेशमा आंशिकदेखि साधारणतया बदली रही बाँकी भू-भागमा आंशिक बदलीदेखि मौसम मुख्यतया सफा रहनेछ ।
कोशी, मधेश र वागमती प्रदेशका थोरै स्थानमा तथा गण्डकी प्रदेशका एक/दुई स्थानमा चट्याङसहित हल्कादेखि मध्यम वर्षाको सम्भावना रहेको विभागले जनाएको छ ।
प्रतिक्रिया