काठमाडाैं, असाेज २३ ।
क्यानाडाको ‘ए’ टीमसँगको चार एक दिवसीय खेलको सिरिज नेपालले जितेको छ ।

गएराति सम्पन्न अन्तिम खेलमा २ विकेटको जित दर्ता गर्दै नेपालले सिरिज ३-१ ले आफ्नो पक्षमा पार्न सफल भएको हो ।

नेपालकाे लागि क्यानाडा ‘ए’ विरुद्धको यो लगातार तेश्राे जित हो । ह्याट्रिक जितकाे लागि अन्तिम खेलमा क्यानाडा ‘ए’ ले दिएको १ सय ९५ रनको लक्ष्य नेपालले ४६ दशमलव २ ओभरमा ८ विकेट गुमाएर पूरा गरेको थियो ।

नेपाली टोली अब क्यानाडाबाटै अमेरिका प्रस्थान गर्ने कार्यक्रम रहेकाे छ । अमेरिकामा नेपालले टी-२० र आईसीसी विश्वकप लिग-२ सिरिज खेल्नेछ । जसअन्तर्गत नेपालले टी-२० श्रृंखलामा १७, १९ र २० अक्टोबरमा अमेरिकासँग सामना गर्नेछ । त्यसपछि नेपालले लिग-२ मा अमेरिका र स्कटल्याण्डसँग खेल्ने तालिका रहेको छ । उक्त सिरिजमा नेपालले २७ अक्टोबर र २ नोभेम्बरमा अमेरिका तथा २९ अक्टोबर र ४ नोभेम्बरमा स्कटल्याण्डसँग प्रतिस्पर्धात्मक खेल खेल्ने छ ।