काठमाडाैं, असाेज २८ ।
झापाको अर्जुनधारामा एक व्यक्तिले धारिलो हतियार प्रहार गरी आफ्नै श्रीमतीको हत्या गरेका छन् ।

आज सोमबार दिउँसो ३ बजेर ५० मिनेटकाे समयमा अर्जुनधारा नगरपालिका वडा नं.-३का भरत कुमालको घर आँगनमा सोही वडाको जुंगेघारी बस्ने ४६ वर्षीय वीरबहादुर चौहानले धारिलो हतियारले घाँटीमा प्रहार गरी आफ्नै श्रीमती ३७ वर्षीया मुना भुजेल चौहानको हत्या गरेका हुन् । हतियार प्रहारबाट मुनाको घटनास्थलमै मृत्यु भएको छ । हतियार प्रहार गरी वीरबहादुर फरार भएका थिए ।

जुकेखाडी सामुदायिक वनको देवीथान होल भन्ने ठाउँमा लुकिछिपी बसेको अवस्थामा ईलाका प्रहरी कार्यालय बिर्तामोडबाट खटिएको टोलीले दिउँसो ४ बजेर ५५ मिनेटमा उनलाई नियन्त्रणमा लिएको डीएसपी प्रकाश बिष्टले बताए । घटनाका बेला श्रीमान् श्रीमती दुबै जनाले मादक पदार्थ सेवन गरेका थिए । घरायसी झै-झगडाका कारण वीरबहादुरले मुनाको हत्या गरेको प्रारम्भिक अनुसन्धानबाट खुलेको डीएसपी बिष्टले बताए ।

पहिलाको श्रीमानलाई छोडेर मुना वीरबहादुरसँग आएकी थिइन् । उनीहरूका एक छोरा र एक छोरी रहेका छन् । वीरबहादुरलाई पक्राउ गरी ईलाका प्रहरी कार्यालय बिर्तामोड ल्याइएको जिल्ला प्रहरी कार्यालय झापाले जनाएको छ ।