काठमाडाैं, माघ १८ ।
पृथ्वी राजमार्गअन्तर्गत आँबुखैरेनी गाउँपालिका-१ सत्रसयमा आज शुक्रबार भएको बस दुर्घटनामा एक जनाको मृत्यु भएको छ भने साेही दुर्घटनामा परी १३ जना घाइते भएको जिल्ला प्रहरी कार्यालयले जनाएको छ ।

दुर्घटनामा चितवनको भरतपुर महानगरपालिका बस्ने २२ वर्षीया सुमिना सापकोटाको मृत्यु भएको जिल्ला प्रहरी कार्यालयका प्रहरी नायब उपरीक्षक अशोक थापाले जानकारी दिएका छन् । दुर्घटनामा घाइते सापकोटालाई उपचारका लागि आँबुखैरेनी अस्पताल पुर्‍याए तापनि चिकित्सकले मृत घोषणा गरेका हुन् ।

दमौलीबाट मुग्लिनतर्फ जाँदै गरेको बा. ५ ख २९९९ नम्बरको बस सडक छेउको कल्भर्टमा पल्टिएको थियो । प्रहरीले बस चालक भानु नगरपालिका-५ बस्ने ३५ वर्षीय रविन्द्र घलेलाई नियन्त्रणमा लिएको छ ।

दुर्घटनामा कैलाली जोशीपुरका २३ वर्षीया लक्ष्मी बनादी, धनगढी बसबरिया गाउँपालिका-५ बस्ने २२ वर्षीया अञ्जली शाही, तनहुँको म्याग्दे गाउँपालिका-७ बस्ने १९ वर्षीय किसान विक, व्यास नगरपालिका-१२ बस्ने १९ वर्षीय सुनिल विक, कास्कीको पोखरा महानगरपालिका-८ बस्ने २२ वर्षीया आयुषा पौडेल, गोरखाको सिरानचोक गाउँपालिका-४ बस्ने ५१ वर्षीय सुनिल ढकाल घाइते भएका छन् ।

त्यसैगरी, लमजुङको बेसीशहर नगरपालिका-३ बस्ने ४१ वर्षीय कृष्णबहादुर पाण्डे, तनहुँको व्यास नगरपालिका बस्ने १३ वर्षीया आस्था काफ्ले, गोरखाको सिरानचोक गाउँपालिका-४ बस्ने ४२ वर्षीय रामशरण कुँवर, शहीद लखन गाउँपालिका-२ घर भई हाल बन्दीपुर गाउँपालिका-१ बस्ने ५९ वर्षीय उज्ज्वल विक, भानु नगरपालिका-१० बस्ने ५० वर्षीय खेमराज लौडारी र सोही ठाउँ बस्ने १७ वर्षीय प्रशान्त लौडारी घाइते भएको प्रहरीले जनाएको छ । उनीहरूको आँबुखैरेनी अस्पतालमा उपचार भइरहेको छ ।

घटनामा घाइते भएकी आँबुखैरेनी गाउँपालिका-३ बस्ने ४२ वर्षीया दमन्ती थापालाई थप उपचारका लागि चितवनको नारायणी सामुदायिक अस्पताल पठाइएको प्रहरीले जनाएकाे छ ।