काठमाडौं, श्रावण १० ।
सिंगापुरमा जारी आईसीसी यू–१९ विश्वकप छनोटअन्तर्गत नेपालले अन्तिम खेलमा अफगानिस्तानबाट एक सय ९६ रनको लक्ष्य पाएको छ ।

खेलमा टस जितेर पहिले ब्याटिङ गरेको अफगानिस्तानले ४६ ओभर ५ बलमा एक सय ९५ रनमा अलआउट भयो । ३६ रनमा पहिलो विकेट गुमाएको अफगानिस्तानले ४४ रनमा दोस्रो विकेट खेर फालेको थियो । त्यसपछि ४९ रन हुदा अफगानिस्तानको तेस्रो विकेट झरेको थियो ।

अफगानिस्तानका लागि इब्राहिम जार्दनले शतकको पारी खेले । उनले एक सय १४ बलमा सात चौका र पाँच छक्काको सहयोगले एक सय एक रन बनाए । नाभिद ओबेइदले २२ रन बनाउदा इक्राम अली खेइलले २४ रन जोडे ।

एक सय ५४ रन हुदा पाच विकेट गुमाएको अफगानिस्तानले त्यसपछि थप ४१ रन बनाउदा बाँकि सबै विकेट गुमायो । बलिङतर्फ नेपालका लागि साहव आलम र दिपेन्द्रसिंह ऐरीले तीन तीन विकेट लिए ।