काठमाडौं, श्रावण १७ ।
प्रशिक्षणका लागि जापान जाने नेपाली राष्ट्रिय टोलीको घोषणा गरेको छ । मुख्य प्रशिक्षक ग्योतुकु कोजीले मंगलबार एन्फा कम्प्लेक्समा जापान जाने २४ सदस्यीय टोली घोषणा गरेको हो ।

एसियन कप छनोटअन्तर्गत आउँदो सेप्टेमबर ५ मा ताजिकिस्तान विरुद्ध हुने खेलको तयारीका लागि नेपली टोली अगस्ट ११ मा दश दिने जापान भ्रमणमा जाँदै छ ।

जापानको ओसाकामा नेपालले स्थानीय पाँच क्लबसँग मैत्रीपूर्ण खेल खेल्नेछ । छानिएका प्रायः खेलाडी एएफसी एसियन कप छनोट अन्तर्गत यमन विरुद्ध खेलेका खेलाडी नै छन् । गोलकिपर किरण चेम्जोङ र रोहित चन्द विदेशमा लिग खेलिरहेकाले जापान जाने टोलीमा समावेश छैनन् ।

नेपाली टोलीमा गोलकिपर विकेश कुथु, विशाल श्रेष्ठ, एलन न्यौपाने, डिफेण्डर विराज महर्जन, अनन्त तामाङ, विमल बस्नेत, देवेन्द्र तामाङ, जितेन्द्र कार्की, कमल श्रेष्ठ, राजेन्द्र रावल, मान बहादुर तामाङ, दीनेश राजवंशी साथै मिडफिल्डर विक्रम लामा, विशाल राई, हेमन गुरुङ, सुजल श्रेष्ठ, अन्जन विष्ट, हेमन्त थापा मगर, सुनिल बाल जाने छन् । फरवार्डमा अनिल गुरुङ, भरत खवास, नवयुग श्रेष्ठ, विमल घर्ती मगर, सुमन लामा समावेश भएका छन् । जापान जाने टिममा प्रशिक्षकसहित ६ जना पनि रहेका छन् ।

जापानमा पहिलो खेल अगस्ट १२ मा गाम्बा ओसाकाको २३ वर्षमुनिको टोलीसँग हुनेछ । नेपालले १६ अगस्टमा क्वानसेइ गाक्विन युनिभर्सिटीसँग खेल्ने छ । १७ अगस्टमा अमिटिज स्पोर्टस् क्लबसँग र अगस्ट १८ मा हानन युनिभर्सिटी तथा १९ अगस्टमा भिसेल कोब को १८ वर्षमुनिको टोलीसँग खेल्नेछ ।

नेपाली टोलीको जापान भ्रमणलाई जापानको विदेश मन्त्रालय र जापान फुटबल संघले व्यवस्थापन गर्नेछ ।