काठमाडौं, फागुन १९ ।
मयुर हिमालयन (प्रा.) लिमिटेडले आगामी चैत्र ७ गतेदेखि १९ गतेसम्म राजधानीमा ‘मिस इन्टरकन्टिनेन्टल युनिभर्स’ प्रतियोगिता आयोजना गर्ने भएको छ ।

नेपालको पर्यटन, सौन्दर्य क्षेत्रको प्रबद्र्धनका लागि गर्न लागिएको उक्त प्रतियोगितामा नेपाल, भारत, संयुक्त राज्य अमेरिका, रुस, बेलायतलगायत २५ देशका एक/एक जना सहभागीले प्रतिस्पर्धा गर्नेछन् ।

सो संस्थाले बुधबार आयोजना गरेको एक पत्रकार सम्मेलनमा संस्थाका अध्यक्ष समीक्षा श्रेष्ठले नेपालको भेषभुषा तथा संस्कृतिलाई अन्तर्राष्ट्रिय तहसम्म पुर्‍याउन अन्तर्राष्ट्रिय तहको सो प्रतियोगिता आयोजनागर्न लागिएको जानकारी दिइन् ।

उनकाअनुसार सहभागी युवतीहरूले अन्तर्राष्ट्रिय तहमा सम्बन्धित राष्ट्रका सम्पदा तथा संस्कृतिलाई एक–आपसमा जानकारी गराउने छन् । सहभागी प्रतियोगीले सर्वोत्कृष्ट व्यक्तित्व, फेशन, बहुआयामिक प्रतिभालगायतका क्षेत्रमा आ–आफ्नो अनुभव आदान–प्रदान गरी त्यस विधामा सम्मान प्राप्त गर्नेछन् ।

उक्त प्रतियोगितामा प्रथम, दोश्रो र तेश्रोलाई क्रमशः पाँच हजार, दुई हजार र एक हजार अमेरिकी डलर पुरस्कारसमेत प्रदान गरिनेछ ।

मुलुकमा विभिन्न सामाजिक गतिविधि सञ्चालन गर्दै आएको आयोजक संस्थाले नेपालमा पहिलो पटक यस किसिमको कार्यक्रम आयोजना गरिएको जनाएको छ ।