काठमाडौं, भाद्र २ ।
सातदोबाटोमा रहेको एन्फा टेक्निकल सेन्टरको कृतिम खेल मैदानमा आजबाट सुरु भएको साफ यू–१५ च्याम्पियनसिपको पहिलो खेलमा बंगलादेशले श्रीलंकालाई ४–० ले पराजित गरेको छ ।

समुह ‘ए’ को खेलको सुरुवातदेखि हावी भएको बंगलादेका लागि मिडफिल्डर मोहम्मद फोयसल अहमद फहिमले ह्याट्रिक गरे । खेलको २८ औं मिनेटमा करिब १० यार्डबाट गोल गरेर अग्रता दिलाएका उनले ३२ औं मिनेटमा अग्रता दोब्बर गरे । करिब २० यार्डबाट गरेको उनको प्रहारले श्रीलंकन गोलरक्षक गिहान सन्दिपालाई कुनै मौका नदिई जाली चुमेको थियो । पहिलो हाफको समाप्ति अघि बंगलादेशका लेफ्ट ब्याक येसिन अराफातले गरेको क्रस सोझै गोलमा परिणत भएको थियो ।

ह्याट्रिक गर्ने क्रममा आफ्नो दोस्रो गोलको खुशियाली मनाउँदै अहमद फहिम(दाँया) । पहिलो हाफमा ३–० को अग्रता लिएको बंगलादेशले दोस्रो हाफमा पनि पकड जमायो । अहमद फहिमले ७६ मिनेटमा गोल गर्दै ह्याट्रिक पुरा गरेका थिए ।

सन् २०११ बाट सुरु भएको च्याम्पियनसिपको अघिल्लो तीन संस्करणमा यू–१६ उमेर समूहमा आयोजना भएको थियो । यसपटक भने सेप्टेम्बेरमा आयोजना हुने यू–१६ एएफसीको प्रतियोगितालाई ध्यान दिदैं यू–१५ उमेर समूहमा आयोजना गरिएको हो ।

भोलीको खेलमा समूह ‘बी’ अन्तर्गत भारत र माल्दिभ्स प्रतिस्पर्धा गर्नेछन् । समूह ‘बि’ मा रहेको आयोजक नेपालले पहिलो खेलमा सोमबार माल्दिभ्सको सामाना गर्नेछ ।