काठमाडौं, फागुन २१ ।
आफ्नो आगामी फिल्म ‘भूमि’ का लागि सुटिङ गरिरहेको क्रममा आगराको ताजनगरीमा सञ्जय दत्तका सुरक्षा गार्ड र मिडियाकर्मीबीच झडप भएको छ । सो झडपमा परी पाँच जना सञ्चारकर्मी घाइते भएका छन् । घटनापश्चात् दत्तले सञ्चारकर्मीहरूसँग माफीसमेत मागेको जनाइएको छ ।

खबरअनुसार, सञ्जय दत्त फिल्म युनिटको साथमा पछिल्लो केही समयदेखि आगरामा सुटिङ गरिरहेका छन् । सोही क्रममा ताजमहलदेखि केही टाढा ‘भीभीआईपी’ सडकमा फिल्मको एक दृश्य लिइरहेका थिए । जसका कारण सडकमा जाम परेको थियो । जामका कारण देश तथा विदेशबाट ताजमहल हेर्न पुगेका पर्यटकहरूले सास्ती खेप्नु परेको थियो ।

यही घटनालाई कभर गर्न केही सञ्चारकर्मी त्यहाँ पुगे । तब दत्तको इशारा पाएपछि सुरक्षा गार्डहरूले मिडियाकर्मीमाथी हमला गर्न पुगेका थिए । सञ्चारकर्मीमाथी कुटपिट भएको भन्दै स्थानीयले पनि विरोध गरे र युरा घटनालाई क्यामेरामा कैद गर्न भ्याएका थिए ।