ललितपुर, भाद्र ५ ।
राजधानीमा जारी रहेको साफ यू–१५ च्याम्पियनशीप फुटबल खेलअन्तर्गत आज भएको पहिलो खेलमा नेपालले माल्दिभ्सलाई ६ विरुद्ध शून्य गोलले पराजित गरेको छ ।

नेपालका लागि १० औँ मिनेटमा ब्रिजेश चौधरीले पहिलो गोल गरेका थिए भने त्यसको ठीक १० मिनेटपछि दोश्रो गोल दर्शन गुरुङले गरेका थिए ।

निकै रोमाञ्चक खेल प्रस्तुत गरेको नेपाली खेलाडीले पहिलो हाफसम्ममा ४ विरुद्ध शून्य गोलले अगाडि रहेको थियो । जसमा तेश्रो गोल कप्तान रोशन रानामगरले पेनाल्टीमार्फत ३६ औँ मिनेटमा गोल थप गरेका थिए । आकाश बुढामगरले ४५ औँ मिनेटमा चौथो गोल गरेका हुन् ।

दोश्रो हाफको खेलमा प्रवेश गरेको पहिलो मिनेटमै नेपालका लागि पाँचौ गोल रोशन दोङले गर्दै नेपाललाई जित सुनिश्चित गरिसकेका थिए तर, पुनः ब्रिजेश चौधरीले नेपालका लागि अन्तिम अर्थात छैठौँ गोल गर्दै नेपाललाई ६ विरुद्ध शून्य गोलले विजयी गराउँदै नेपाल सेमिफाइनलमा प्रवेश गरेको छ । अर्को खेल पर्सि बुधबार नेपालले भारतसँग प्रतिस्पर्धा गर्ने छन् ।