काठमाडौं, फागुन २२ ।
स्पेनिस ला लिगामा लियोनल मेसीको दुई गोलको मद्दतले बार्सिलोनाले सेल्टा भिगोलाई ५ विरुद्ध शून्य गोलले पराजित गरेको छ । गएराति बासिलोनाको घरेलु मैदानमा भएको खेलमा बार्सिलोनाले सेल्टालाई ठूलो गोल अन्तरले पराजित गरेको हो ।

बार्सिलोनाको जितमा मेसीले दुई, नेइमार, राकेटिक र उमटिटिले एक एक गोल गरेका थिए । मेसीले खेलको २४ औँ मिनेटमा पहिलो गोल गर्दै बार्सिलोनालाई सुरुवाती अग्रता दिलाएका थिए भने खेलको ४० औँ मिनेटमा नेइमारले गोल गर्दै बार्सिलोनाको अग्रतालाई दोब्बर पारेका थिए । त्यसपछि खेलको ५७ औँ मिनेटमा राकेटिकले गोल गरे भने खेलको ६१ औँ मिनेटमा उमटिटिले गोल गर्दै बार्सिलोनालाई ४ विरुद्ध शून्य गोलको अग्रता दिलाएका थिए । त्यसपछि मेसीले बार्सिलोनाका लागि पाँचौ गोल खेलको ६४ औँ मिनेटमा गरेका थिए ।

जितसँगै बार्सिलोनाले लिगमा आफ्नो अग्रता कायम राखेको छ । हाल २६ खेलमा ६० अंकसहित बार्सिलोना लिगको शीर्ष स्थानमा रहेको छ भने बार्सिलोनाभन्दा एक खेल कम खेलेको रियल २५ खेलमा ५९ अंकसहित लिगको दोश्रो स्थानमा रहेको छ । त्यस्तै सेल्टा भिगो २५ खेलमा ३५ अंकसहित लिगको १० औँ स्थानमा रहेको छ ।