काठमाडौं, भाद्र ८ ।
भारतीय युवा टोलीका प्रशिक्षक बिबिआनो फर्नान्डेजले साफ यू–१५ फुटबल च्याम्पियनसिपको फाइनलमा नेपालसँगै खेल्ने इच्छा व्यक्त गरेका छन् ।

समूह ‘बी’ को अन्तिम खेलमा घरेलु टोली नेपाललाई २ गोल विरुद्ध १ गोलले हराएपछि प्रशिक्षक फर्नान्डेजले पोस्ट म्याच कन्फ्रेन्समा भने, ‘घरेलु टोली नेपालले राम्रो खेल्ने आशा गरेको छु । हामी पुनः नेपालसँग फाइनल खेल्न चाहन्छौं ।’

बुधबारको नतिजापछि पहिले नै सेमिफाइनल पुगिसकेका दुई टोलीमध्ये भारत समूह विजेता र नेपाल उपविजेता बनेका छन् । शुक्रबार एकै समयमा हुने सेमिफाइनलमा नेपालले बंगलादेश र भारतले भुटानको सामना गर्नेछ ।

भारतलाई प्रतियोगितामा बढी उमेरको खेलाडी सहभागी गराएको भन्ने आरोपको खण्डन गर्दै प्रशिक्षकले भारत ग्रासरुट तहमा गम्भीर रहेको बताए । ‘भारतले उमेर समूहका खेलाडीको विकासमा प्रयास गर्दै आएको छ । हामीसँग हरेक राज्यमा सक्रिय स्काउटहरू छन् । भारतले युवा फुटबलमा गम्भीरतापूर्वक ध्यान दिइरहेको छ,’ उनले भने, ‘भारतलाई प्रश्न गर्नुअघि आफ्नो टोलीको तयारी कस्तो भएको थियो भनेर समिक्षा गर्न जरुरी छ ।’

माल्दिभ्स र बंगलादेशका प्रशिक्षकले भारतले बढी उमेरका खेलाडी खेलाएको हुन सक्ने आशंका गरेका थिए ।