काठमाडौं, भाद्र ९ ।
नेपाली युवा टोली यू–१५ साफ च्याम्पियनसिप फुटबल प्रतियोगिताको फाइनलमा प्रवेश गरेको छ । सातदोबाटोस्थित एन्फा कम्प्लेक्सको क्रितिम मैदानमा भएको खेलमा बंगलादेशलाई ४ गोलविरुद्ध २ गोलले पराजित गर्दै नेपाल फाइनलमा प्रवेश गरेको हो ।

नेपाल यसअघि सन् २०१३ मा यू–१६ साफ च्याम्पियनसिप खेलमा हेमन थापा मगरको कप्तानीमा फाइनल प्रवेश गरेको थियो । यसपटक पनि नेपालले उपाधिका लागि भारतको सामना गर्नेछ । हलचोकमा भएको अर्को सेमिफाइनलमा भुटानलाई ३ गोलविरुद्ध शून्य गोलले हराउँदै भारतले नेपालसँगको खेल पक्का गरेको छ ।

पहिलो हाफमा २ गोल गरेको नेपालले ६५ औं मिनेटमा अर्को थप गोल गरे पछि अग्रता जोगाउन संघर्ष गर्नुपरेको थियो । एक मिनेटमै दुई गोल गरेपछि बंगलादेश खेलमा फर्केको थियो । ७३ औं मिनेटमा फैसल अहमेद फहिमले पेनाल्टी बक्स बाहिरबाट बंगलादेशका लागि पहिलो गोल फर्काएका थिए । यसिन अराफातको फ्रिकिकमा बल भेट्टाएपछि फैसलले गोल गरेका हुन् । त्यसको लगत्तै अर्को गोल गरेर बंगलादेशले नेपालमाथि दबाब बढाएको थियो ।

पहिलो हाफमा नेपालले २ गोलविरुद्ध शून्य गोलको अग्रता लिएको थियो । ५५ औं मिनेटमा चोटका कारण मैदान बाहिरिनुअघि आकाश नेपाली टोलीको नायक रहेका थिए । पहिलो हाफको दुवै गोल उनले गरे । छैटौं मिनेटमा पहिलो गोल गरेका आकाशले दोस्रो गोल ३० औं मिनेटमा गरेका थिए । पहिलो गोलको दाजोमा दोस्रो गोल सहज थियो । रन्दिप पौडेलको क्रसमा बंगलादेशका सादेकु जमान फहिमले क्लिर गर्न नसक्दा आकाशले सिक्स यार्ड बक्स

६५ औं मिनेटमा नजमुल विश्वासको आत्मघाती गोलमा नेपालले अग्रता बढाएको थियो । नेपालका कार्लोस बखारियको क्रसलाई रोक्ने क्रममा नजमुलको आत्मघाती गोल भएको थियो ।

छ मिनेट थप गरेको समयको केही सेकेन्डमात्र बाँकी रहँदा ब्रिजेश चौधरीले गोल गरेपछि दबाबमा रहेको नेपालले राहत महसुश गरेको थियो । रन्दिपको क्रसमा ब्रिजेशले नजिकबाट गोल गर्दै नेपालको जित पक्का गरेका थिए । लगातार दुई गोल गरेपछि खेलमा नियन्त्रण बनाएको बंगलादेशले थप गोलको अवसर पाएपनि सफल हुन सकेन । छ मिनेट थप गरेको समयमा पनि बंगलादेशको लगातार दबाब रहेता पनि अन्तिम समयमा गोल नेपालले गरे ।