काठमाडौं, भाद्र ११ ।
काठमाडौंमा जारी रहेको यू–१५ साफ च्याम्पियनशीप फुटबलअन्तर्गत आज आयोजक नेपाल र भारतबीच प्रतिस्पर्धात्मक खेल हुँदैछ । दुबै टोलीले उपाधि जित्ने दाबी गरेका छन् । फाइनल खेल ललितपुरको सातदोबाटोस्थित एन्फा मुख्यालयको कृतिम मैदानमा दिउँसो ३ बजे खेल हुनेछ ।

शनिबार भएको पत्रकार सम्मेलनमा नेपाली टोलीका प्रशिक्षक सुनिल कुमार श्रेष्ठले फाइनलमा हार नदोहोरिने बताएका छन् । ‘भारतसँग समूह चरणमा आफ्नै केही गल्तीले हार्‍यौं । गल्ति सुधार्दै फाइनल जित्न चाहन्छौं ।’ प्रशिक्षक श्रेष्ठले भने, ‘हाम्रो खेलमा क्रमशः सुधार भइरहेको छ । भारतलाई हराउनेमा आशावादी छौं । समूह चरणको हारले दबाब भन्दा पनि कमजोरी सुधार्ने मौका मिलेको छ ।’

भारतीय टोलीका प्रशिक्षक विभियानो फर्नाण्डेजले नेपाललाई समूह चरणमा पराजित गरिसके पनि फाइनल खेल पूरै फरक हुने बताए । उनले भने, हामी पनि जित्न मेहनत नै गर्नेछौं’, ‘समूह चरणभन्दा फाइनल खेल पक्कै पनि गाह्रो हुने गर्दछ । नेपाललाई घरेलु दर्शकको साथ छ । खेल रोमाञ्चक र प्रतिस्पर्धात्मक हुनेछ ।’

नेपाली टोलीका कप्तान रोशन थापामगरले लगातारको खेलले टोलीको प्रदर्शनमा सुधार भएकोले फाइनलमा हराउने आशा व्यक्त गरे । उनले भने, ‘हाम्रो सट पासहरूमा केही समस्या छ । त्यसलाई सुधार्न सके भारतलाई पराजित गर्न सकिन्छ ।’ प्रशिक्षक श्रेष्ठले भारत बलियो प्रतिद्वन्द्वी भएको स्वीकार्दै उनीहरूसँग कुनै पनि हालतमा गल्ती नदोहोर्‍याई खेल्ने बताए ।

आजै तेश्रो स्थानको लागि भुटानले बंगलादेशको सामना गर्नेछ । खेल हल्चोक मैदानमा दिउसो साढे २ बजे सुरु हुनेछ । प्रतियोगितामा छ दक्षिण एशियाली राष्ट्रको सहभागिता रहेको छ । यसअघि यू–१६ साफ च्याम्पियनशीप हुँदै आएकोमा यस पटकदेखि यू–१५ साफ च्याम्पियनशीपको आयोजना गरिएको हो ।