काठमाडौं, भाद्र ११ ।
साफ यू १५ च्याम्पियनसिप फुटबलको उपाधि भारतले हात पारेका छन् । सातदोबाटोमा रहेको एन्फा कम्प्लेक्सको खेल मैदानमा आज सम्पन्न खेलमा नेपाल भारतसँग २–१ गोलले पराजित हुँदै उपाधिबाट वञ्चित भएको हो ।

यसअघि यू १६ उमेर समूहमा हुने प्रतियोगितामा नेपालको यो भारतसँग पाँचौ हार हो । यसअघि नेपाल २०१३ मा हेमन्त थापामगरको कप्तानीमा साफ यु १६ मा फाइनलमा १–० गोलले पराजित भएको थियो ।

नेपालले पहिलो हाफमा पेनाल्टीमार्फत अग्रता बनाएको थियो । भारतीय डिफेन्डरले रञ्जन पुनलाई डिबक्सभित्र फल गरेपछि रेफ्रीले नेपाललाई पेनाल्टीको अवसर दिएका थिए । स्ट्राइकर ब्रिजेश चौधरीले पेनाल्टीलाई सदुपयोग गर्दै ४१ औं मिनेटमा टोलीलाई अग्रता दिलाए ।

पहिलो हाफमा भारतलाई दवावमा राखेको नेपालले सोही दवाव दोस्रो हाफमा कायम राख्न सकेन । शारीरिक रूपमा बलिया भारतीय खेलाडीसामू नेपाली खेलाडीहरू कमजोर देखिन थाले ।

भारतका परिवर्तित खेलाडी लाल रोकिमाले भारतका लागि बराबरी गोल फर्काउदा कप्तान विक्रम प्रताप सिंहले भारतको जितमा निर्णायक गोल गरे । लगातार आक्रमण बनेको भारतले ५९ औं मिनेटमा बराबरी गोल फर्काएको थियो भने ७५ औं मिनेटमा कप्तान विक्रम प्रताप सिंहले दुई डिफेन्डरलाई बिट गर्दै उत्कृष्ट गोल गर्दै भारतलाई खेलमा अग्रता दिलाए । त्यसपछि थप गोल हुन नसक्दा भारतले २ गोलविरुद्ध १ गोलले खेल आफ्नो पक्षमा पार्‍यो।

२०१५ मा भएको साफ यू १५ च्याम्पियनसिप फुटबल खेलमा भारतलाई ४–२ गाेलले हराउँदै बंगलादेशले जित हासिल गरेका थिए ।