बारा, पुस १८ ।
बाराको पथलैयानजिक दुधौरा पुलमा गएराति बस दुर्घटना हुँदा दुई जनाको ज्यान गएको छ भने ५४ जना घाइते भएका छन् ।

नयाँ वर्षको अवसरमा हेटौँडाको शहीद स्मारकमा पिकनिक मनाएर फर्कंदै गर्दा सर्लाहीको परबानीपुर गाविसस्थित श्री डिम जनता उच्च माविका विद्यार्थीहरू चढेको बस दुर्घटना भएको हो ।

दुर्घटनामा परी मृत्यु हुनेमा सर्लाही चिसापानी गाविस–१ बस्ने १८ वर्षीया रबिना बैजु र सोही गाविस–५ बस्ने १९ वर्षीय संदेश बस्नेत रहेका छन् भने घाइते मध्ये चार जनाको अवस्था चिन्ताजनक रहेको इलाका प्रहरी कार्यालय सिमराले जनाएको छ ।

३५ जना अट्ने सिट क्षमता रहेको उक्त बसमा ८५ जना विद्यार्थी सवार रहेको हुँदा चालकले गति नियन्त्रण गर्न नसक्दा दुर्घटना भएको बसमा सवार घाइते कृष्ण योञ्जनले बताए ।

घाइतेहरूको वीरगञ्जस्थित गण्डक हेल्थ केयर, वीरगञ्ज हेल्थ केयर, नेशनल मेडिकल कलेज र सिमरास्थित तराई हस्पिटलमा उपचार भइरहेको प्रहरीले जनाएको छ ।