चितवन, पुस २० ।
तरकारी बोक्ने बोलेरो जिपको ठक्करबाट चितवनमा एक जना प्रहरी जवानको ज्यान गएकाे छ । अर्का एक जना गम्भीर घाइते भएका छन् ।गएराति करिब साढे ८ बजे साइकलमा हिँडिरहेका बेला जिपको ठक्करबाट जुनियर प्रहरी अधिकृत शिक्षालय, भरतपुरमा कार्यरत ३० वर्षीय प्रहरी जवान इनम दवाडीको ज्यान गएकाे चितवनका प्रहरी उपरीक्षक दीपक थापाले जानकारी दिए ।

सो दुर्घटनामा परी मोरङ घर भई सोही शिक्षालयमा कार्यरत ३३ वर्षीय सुमन घिमिरे गम्भीर घाइते भएका छन् । उनको अहिले चितवन मेडिकल कलेजमा उपचार भइरहेको छ । चितवनको रत्ननगरबाट तरकारी बोकेर काठमाडौं जाँदै गरेको ना. ३ च ८३१ नम्बरको बोलेरो जिपले साइकलमा सवार प्रहरीलाई ठक्कर दिएको हो । जिप र त्यसका चालकलाई नियन्त्रणमा लिइएको र शवलाई भरतपुर अस्पतालमा राखिएको प्रहरीले जनाएको छ ।