काठमाडौं, पुस २६ ।
स्वतन्त्र विद्यार्थी युनियन निर्वाचन प्रचार प्रसारको विषयलाई लिएर राजधानीको पद्मकन्या क्याम्पसमा विद्यार्थी संगठनबीच झडप भएको छ ।

सोमबार भएको झडपमा दुबै पक्षले आफ्ना विद्यार्थी कुटिएको दाबी गरेका छन् । स्ववियु निर्वाचन प्रचार प्रसार र भित्ते लेखन विषयमा विवाद हुँदा झडप भएको हो । झडपमा नेविसंघले अनेरास्ववियु (क्रान्तिकारी) नेतृ सीता मिजारलगायतमाथी छुरा प्रहार गरेको आरोप लगाएको छ । उसले प्रहरी घटनामा रमिते बनेकोसमेत दाबी गरेको छ ।

तर, अखिल क्रान्तिकारीले भने घटनामा नेविसंघ विद्यार्थीले आफ्ना संगठनका विद्यार्थीमाथी आक्रमण गरेर घाइते बनाएको दाबी गरेको छ । अखिल क्रान्तिकारीका प्रवक्ता सुरेन्द्र बस्नेतले सोमबार विज्ञप्ति जारी गर्दै नेविसंघले आफ्ना विद्यार्थीमाथी सांघातिक आक्रमण गरेको दाबी गरे । नेविसंघ महामन्त्री साधना घिमिरे नेतृत्वमा आएको टोलीले अखिल क्रान्तिकारीका विद्यार्थी बसन्ता भण्डारी, गंगा दाहाल, दर्शना नेपालीलगायतमाथी आक्रमण गरेको विज्ञप्तिमा उल्लेख छ ।

नेविसंघले भने अखिल क्रान्तिकारीका घाइते भनेर विज्ञप्तिमा भनिएकाले नै आफूहरूमाथी आक्रमण गरेको बताएको छ । घाइते नेविसंघ नेतृ सीता मिजारको बागबजारस्थित मोडल अस्पतालमा उपचार भइरहेको नेविसंघ केन्द्रीय सदस्य शैलेन्द्र गौडेलले बताए । क्रान्तिकारीका धेरै जना मिलेर मिजारमाथी आक्रमण गरेको उनको आरोप छ ।
आजको राजधानी दैनिकमा समाचार छापिएको छ ।