काठमाडौं, पुस २६ ।
अख्तियार दुरूपयोग अनुसन्धान आयोगका कर्मचारीहरूले सोमबार बिहान गेटैमा रहेको भित्ताबाट लोकमानसिंह कार्कीको फोटो हटाए । त्यसमुनि रहेको ‘माननीय प्रमुख आयुक्त’ लेखिएको हटेन । मध्यान्ह अख्तियार मुख्यालय टंगाल पुग्दा प्लेटमाथीको भित्तामा फोटो फ्रेमको दाग मात्रै बाँकी थियो । प्रमुख आयुक्तका रूपमा कार्कीको फोटो हटे पनि पूर्व–प्रमुख आयुक्तहरूको नाम र फोटोको लहरमा उनको सूची भने थपिएन ।

‘पूर्व–प्रमुख आयुक्तका रूपमा उनी (कार्की) लाई अख्तियारले स्मरणमा राख्न आवश्यक रहेन,’ एक आयुक्तले भने, ‘सर्वोच्च अदालतले संवैधानिक परिषद्को सिफारिस, त्यसका आधारमा भएको नियुक्ति र सपथलाई त्यही दिनदेखि उत्प्रेषणको आदेशले बदर गरिदिएपछि उनलाई कसरी योग्य प्रमुख आयुक्तको रूपमा संस्थाले स्मरण गर्ने ?’

आयोगले कार्कीकै बारेमा हालसम्म कुनै औपचारिक निर्णय गरेको छैन । तर पनि अन्य पूर्व–प्रमुख र आयुक्तहरूलाई झैँ आयोगले कार्कीलाई सम्मानपूर्वक स्मरणमा राख्ने, औपचारिक कार्यक्रमहरूमा निमन्त्रणा गर्नेलगायतका आलंकारिक सम्मानको स्थानमा राख्ने सम्भावना भने नरहेको ती आयुक्तले बताए । सोमबारै अख्तियारको वेबसाइटबाट कार्कीको नाम र फोटो हटाइएको छ । तर सोमबार रातिसम्म पनि कार्कीले ट्वीटर ह्याण्डलमा आफूलाई अख्तियार प्रमुखको रूपमै परिचित गराएका थिए ।

सर्वोच्च अदालतका पूर्वन्यायाधीश तथा पछिल्लो जनआन्दोलनमा भएको दमनबारे छानबिन गर्न गठित आयोगका संयोजक कृष्णजङ्ग रायमाझीले कार्कीको नियुक्ति नै बदर भएकाले उनको हैसियत नियुक्त हुनुअघिको मितिकै जस्तो हुने बताए । ‘नियुक्तिको औचित्य नै गलत भइसकेपछि उहाँसँग पूर्व–प्रमुख आयुक्तको हैसियत छ भन्नै मिलेन,’ रायमाझीले भने, ‘सर्वोच्च अदालतले उहाँको नियुक्तिलाई नै वैध नठहर्‍याएपछि हामीले पूर्व–प्रमुख आयुक्तको पगरी थपिदिन मिल्दैन ।’

विशेष अदालतका पूर्वअध्यक्ष गौरीबहादुर कार्की पनि लोकमानको अबको बायोडाटामा सर्वोच्च अदालतले निर्णयमा सुनाएका शब्दावली थप्न मिले पनि अख्तियारको प्रमुखका रूपमा काम गरेको अवधि थप्न नमिल्ने बताउँछन् । ‘जुन कुरा सर्वोच्च अदालतले वैध थिएन भन्छ, त्यही (प्रमुख आयुक्त) हो भनेर सम्बोधन गर्न मिल्छ र ?’ सर्वोच्च अदालतको आइतबारको आदेशले (तत्कालीन) प्रधानन्यायाधीशबाट लोकमानलाई गराइएको प्रमुख आयुक्त पदको सपथलगायत निजलाई नियुक्ति गर्दाको सन्दर्भमा भएका काम–कारबाही उत्प्रेषणको आदेशद्वारा बदर हुने ठहर्‍याएको थियो ।
आजको कान्तिपुर दैनिकमा समाचार छापिएको छ ।