काठमाडाैं, बैशाख ३ ।
जारी रहेकाे यू-१९ विश्वकप क्रिकेटको एशियास्तरको छनाेटअन्तर्गत आज भएकाे खेलमा नेपाली युवा टीमले ओमानलाई फराकिलाे रनले पराजित गरेको छ ।

नेपालले दिएको २३० रनको लक्ष्य पछ्याएको ओमान ४४ दशमलव १ ओभरमा ७९ रन बनाएर अलआउट भएपछि नेपालले खेल १५० रनले जितेको हो ।

ओमानका लागि जील तन्ना र अम्रप्रित सिराहले सर्वाधिक १३-१३ रन बनाए भने अन्य कुनै पनि खेलाडीले दोहोरो अंकमा रन बनाउन सकेका थिएनन् ।

ओमानलाई अलआउट गर्ने क्रममा पवन सराफले ३ विकेट लिएका थिए । त्यस्तै सूर्य तामाङ र प्रतिस जिसीले २-२ विकेट लिए भने कुशल मल्ल, कमलसिंह ऐरी र भीम सार्कीले एक–एक विकेट लिएका थिए ।

यसअघि, टस हारेर पहिला ब्याटिङ्ग गरेको नेपाली टीमले ओमानलाई २३० रनको लक्ष्य दिएको थियाे । नेपाल ४३ दशमलव २ ओभरमा अलआउट हुँदै २२९ रनमा समेटिएको थियो ।

नेपालको इनिङ्गमा पुछारका ब्याट्सम्यान प्रतिस जिसीले तुफानी ब्याटिङ्ग गरेपछि नेपालले ओमानलाई सम्मानजनक लक्ष्य दिन सफल भएको हो । प्रतिसले तुफानी ब्याटिङ्ग गर्दै २३ बलमा ४१ रन बनाएका थिए । जिसीले आफ्नो पारीमा ४ छक्का र २ चौका प्रहार गरेका थिए । १०औँ विकेटका लागि प्रतिस र सूर्य तामाङले ५१ रनको साझेदारी गरेका थिए । तामाङले ७ रन बनाएर जिसीलाई साथ दिएका थिए ।

त्यस्तै, कप्तान रोहित पौडेलले सर्वाधिक ७५ रन बनाएका थिए । रोहितले ८१ बलमा ५ चौका र २ छक्का प्रहार गर्दै ७५ रन बनाएका भने भीम सार्कीले ३९ रन बनाए ।

त्यसैगरी, अभिषेक बस्नेतले १५, रीत गौतमले १० रन बनाए । अन्य ब्याट्सम्यानहरूले दोहोरो अंकमा रन बनाउन सकेनन् । पवन सराफ ५, सन्दीप जोरा ४, हरिबहादुर चौहान २, कुशल मल्ल २, कमलसिंह ऐरीले १ रन बनाएर आउट भएका हुन् ।

ओमानका बलर सञ्जय रविन्द्र, जील तन्ना, मुजाहिर राजा र अजाम अलीएल २-२ विकेट लिए भने यश मेहता र प्रथमेश कुम्बले एक–एक विकेट लिएका थिए ।

प्रतियोगितामा नेपालले अहिलेसम्म खेलेका चार खेलमध्ये तीन खेलमा जित हासिल गरेको छ भने एक खेलमा पराजित भएको छ । त्यस्तै ओमान चार खेलमा एक खेलमा जित र तीन खेलमा पराजित भएको छ ।

प्रतियोगिताको विजयी टीम सिधैँ एशियाबाट सन् २०२० को जनवरी फेब्रुअरीमा दक्षिण अफ्रिकामा हुने यू-१९ विश्वकप क्रिकेटमा छनाेट हुनेछ ।
प्रतियोगिताअन्तर्गत नेपालले अब छनाेट खेलको अन्तिम तथा पाँचौ खेल अप्रिल १८ मा कुबेतविरुद्ध प्रतिस्पर्धा गर्नेछ ।

मलेसियामा हुने एशियास्तरको यू-१९ विश्वकप छनाेट खेलका लागि रोहितकुमार पौडेलको कप्तानीमा १४ सदस्यीय टीम खेलिरहेको छ ।

त्यस्तै टीमको प्रमुख कोचमा विनोदकुमार दास रहेका छन् भने विक्रम न्यौपाने फिजियो तथा टीम म्यानेजर तथा एनालिष्टमा रमन शिवाकोटी रहेका छन् ।