काठमाडौं, बैशाख ८ ।
इटालियन सिरी ‘ए’ फुटबल प्रतियोगिताको उपाधि आठौँ पटक युभेन्ट्सले हात पार्न सफल भएको छ । गएराति सम्पन्न भएको खेलमा फियोरेन्टिनालाई २–१ गोल अन्तरले पराजित गर्दै युभेन्ट्सले लगातार आठौँ पटक उपाधि जित हात पारेको हो । घरेलु मैदानमा सुरुवाती अग्रता उल्टाएर युभेन्ट्सले जित दर्ता गरेको हो ।

मिलेनकोभिकले खेलको छैटौँ मिनेटमा गोल गर्दै फियोरेन्टिनालाई अग्रता दिलाएका थिए । खेलको ३७ औँ मिनेटमा सान्ड्रोले गोल गर्दै घरेलु टोलीलाई खेलमा फर्काए थिए ।

त्यसपछि खेलको ८३ औँ मिनेटमा जर्मनले आत्मघाती गोल गर्दा युभेन्ट्सले २–१ को जित निकालेको हो । योसँगै युभेन्ट्सले लगातार आठ सिजन सिरी ‘ए’ को उपाधि जितेर कीर्तिमान कायम गरेको छ ।

लिगका केही खेल बाँकी रहँदै उपाधि जित्ने क्रममा युभेन्ट्सले ३३ खेलबाट ८७ अंक जोडेको छ । युभेन्ट्स दोश्रो स्थानको नेपोली २० अंकले अघि रहेको छ ।

समग्रमा युभेन्ट्सको यो ३५ औँ लिग उपाधि हो । युभेन्ट्सको महिला टोलीले पनि शनिबार नै सिरी ‘ए’ को उपाधि जितेको थियो ।