काठमाडौं, बैशाख ८ ।
लुम्बिनी जनरल इन्स्योरेन्सको आयोजनामा कम्पनीको दोश्रो संस्करणअन्तर्गत यहीँ बैशाख ६ र ७ गते रोयल नेपाल गल्फ क्लब एयरपोर्टमा दुई दिने अन्तर्राष्ट्रिय गल्फ प्रतियोगिता सम्पन्न भएको छ । युवा र प्रौढ गरी दुई समूहमा विभाजन गरिएको उक्त टुर्नामेन्ट–२०१९ मा ९७ जना खेलाडीको सहभागिता रहेको थियो । जसमा १२ जना साना र ८५ जना सिनियर खेलाडीहरू रहेका थिए ।

खेलकुदमार्फत पनि आफ्नो गुडविललाई बजारमा लैजान सकिन्छ र खेलको विकासमा सानै भए पनि यस किसिमको सहयोग खेलाडी एवं क्लबलाई गर्न पाएकोमा आफूहरू खुसी भएको लुम्बिनी जनरल इन्स्योरेन्सका अध्यक्ष मनोहरदास मुलले बताए । सोही अवसरमा phintso ongdi lama ले आमन्त्रित गल्फ टुर्नामेन्टको उपाधि हात पार्न सफल भएका थिए । त्यस्तै सुपर सिनियर खेलाडी मेजर विजय मोक्तान घोषित भएका थिए । विजयी खेलाडीहरूलाई रोयल नेपाल गल्फका अध्यक्ष प्रचण्डबहादुर श्रेष्ठ र इन्स्योरेन्सका अध्यक्ष मनोहरदास मुल र कम्पनीका सीईओ नुरप्रकाश प्रधानले उत्कृष्ट खेलाडीहरूलाई अवार्ड हस्तान्तरण गरेका थिए ।

वि.सं. २०६१ सालमा स्थापित लुम्बिनी जनरल इन्स्योरेन्सले फेयर अण्डर राइटिङ्ग, स्मार्ट क्लेम सर्भिस र क्वालिटी म्यानेजमेन्टमा ISO certified मान्यता प्राप्त गर्न सफल भएको कम्पनीद्वारा जारी विज्ञप्तिमा उल्लेख गरिएको छ ।

हाल ४५ शाखामार्फत ग्राहकहरूलाई उत्कृष्ट सेवा तथा सुबिधा उपलब्ध गराउँदै आएको कम्पनीका प्रमुख कार्यकारी अधिकृत नुरप्रकाश प्रधानले बताए । कम्पनीले चालु आ.व. भित्रै तोकिएबमोजिमको चुक्ता पूँजी पुर्‍याउने उनले बताएका छन् ।