काठमाडाैं, बैशाख १४ ।
थाइल्याण्डमा जारी रहेकाे एसीसी यू–१६ पूर्वी क्षेत्रीय क्रिकेट प्रतियाेगिताकाे फाइनलमा नेपाल प्रवेश गर्न सफल भएकाे छ । थाइल्याण्डको चियाङमाईमा आज भएको सेमिफाइनल खेलमा नेपालले हङकङलाई चार विकेटले पराजित गरेकाे हाे ।

हङकङले दिएको ८७ रनको झिनाे लक्ष्य नेपालले २१ दशमलव ४ ओभरमा ६ विकेटको क्षतिमा पूरा गरेको थियो । नेपालको जितमा आशिष भट्टराईले सर्वाधिक १७ रन बनाए ।

रोहन दुदराज विकले १४, कृष्ण कार्कीले १२, दीपक बोहोराले ११ र सुवास आएरले १० रन बनाएका हुन् । बलिङमा हङकङका ब्रिजनरेन शिवपुरीले तीन विकेट लिएका थिए । आहान खान्हाई त्रिवेदीले दुई विकेट लिए ।

यसअघि, टस जितेर पहिले ब्याटिङ गरेको हङकङले ३२ दशमलव २ ओभरमा सबै विकेट गुमाएर ८६ रन बनाएको थियो। हङकङका लागि आरुश भगतले सर्वाधिक ४३ रन बनाएका हुन् ।

अन्य ब्याट्सम्यानहरू भने राम्राेसँग जम्न सकेनन् । हङकङलाई सस्तैमा समेट्न नेपालका निखिलकुमार सिंहले चार विकेट लिएका थिए । विशालकुमार पटेल र रमेश कुर्मीले दुई दुई तथा तिलक राजभण्डारीले एक विकेट लिएका थिए ।

फाइनलमा प्रवेश गरेकाे नेपालले अब मलेसियासँग प्रतिस्पर्धा गर्ने भएकाे छ। आजै भएको अर्को सेमिफाइनल खेलमा मलेसियाले सिङ्गापुरलाई ५७ रनले हराउँदै नेपालसँगको उपाधि भिडन्त पक्का गरेको हो ।