काठमाडौं, बैशाख १५ ।
जारी रहेको एसीसी यू–१६ अन्तर्गत आज भएको फाइनल खेलमा नेपालले मलेसियालाई ८० रनले पराजित गर्दै उपाधि हात पार्न सफल भएको छ ।

आज भएको प्रतिस्पर्धात्मक फाइनल खेलमा मलेसियालाई ८० रनले पराजित गर्दै नेपालले लगातार दोश्रो पटक एसीसी यू–१६ इस्टर्न रिजनको च्याम्पियन बनेको हो ।

नेपालले दिएको १४१ रनको लक्ष्य पछाएको मलेसिया ३४ दशमलव ५ ओभरमा ८१ रन बनाएर अलआउट भएपछि नेपाल ५९ रनले विजयी भएको हो ।

मलेसियाका लागि वान मुहम्मद अजामले सर्वाधिक १६ रन बनाए भने मुहमद हजिक अलिफले १८ तथा जिनेन्द्र मुरलीले १४ रन बनाए । अन्य ब्याट्सम्यानले दोहोरो अंकमा रन बनाउन असफल भएका थिए ।

फाइनलमा नेपाली बलरहरूले उत्कृष्ट बलिङ गरेका थिए । नेपालका बलरहरूले ६ ओभर मेडन बलिङ गरेका थिए । नेपालका लागि बिशाल कुमार पटेलले ४ विकेट लिए भने दीपक बोहोराले ३ विकेट लिएका थिए । त्यस्तै, निखिल कुमार सिंह र क्रिस कार्कीले एक–एक विकेट लिएका थिए ।

यसअघि, नेपालले टस जितेर पहिला ब्याटिङ गर्दै ३५ ओभरमा ९ विकेट गुमाउँदै १४० रनको बनाएको थियो । नेपालका लागि प्रशान्त महतले सर्वाधिक ४० रन बनाएका थिए । त्यस्तै ओपनर दीपक बोहोराले २३ रन बनाए भने कप्तान बिशाल बिक्रम केसीले १७ रन बनाएर आउट भएका थिए ।

त्यसैगरी, निखिल कुमार सिंहले १३ रन बनाएर आउट भएका थिए ।

नेपालका लागि कप्तान बिशाल र प्रशान्तले सर्वाधिक ३५ रनको साझेदारी गरेका थिए । त्यसपछि प्रशान्त र रोहण दुधराज बिकमिलेर २७ रनको दोस्रो ठुलो साझेदारी गरेका थिए । ओपनर दीपक बोहोरा र सुशान्त थापाले २२ रनको साझेदारी गरेपछि नेपालको विकेट झार्न सुरु भएको थियो ।

नेपालका लागि शुसान्त थापाले ५, अइस भट्टराईले २, रोहण बिकले ९, बिशाल कुमार पटेलले २, क्रिस कार्कीले ९ रन बनाएर आउट भएका थिए । त्यसपछि तिलकराज भण्डारीले अविजित ८ रन बनाए भने रमेश कुर्मीले अविजित २ रन बनाए ।

मलेसियाका बलर सचिनु हेटिजले सर्वाधिक ३ विकेट लिए भने जिनेन्द्र मुरलीले २ विकेट लिएका थिए । त्यस्तै, अहमद अकमल, मुहमद अमिरुल, सिद्धार्थ कार्तिक र शर्भीन सुरेन्द्रणले एक–एक विकेट लिएका थिए ।

यसअघि, २०१७ मा भएको प्रतियोगिता नेपालले जितेको थियो । नेपालले सिङ्गापुरलाई ७१ रनले पराजित गर्दै उपाधि जितेको थियो ।