काठमाडाैं, जेठ १६ ।
गएराति सम्पन्न भएकाे च्याम्पियन्स लिगकाे फाइनल खेलमा प्रिमियर लिग प्रतिस्पर्धी टोटनह्यामलाई २ विरुद्ध शून्य गाेलले पराजित गर्दै लिभरपुलले छैठाैँ पटक लिगको उपाधि उचाल्न सफल भएकाे छ ।

सन् २००५ यता लिभरपुलको यो पहिलो ठूलो उपाधि हो । स्पेनको मड्रिडस्थित स्टाडियो वाण्डा मेट्रोपोलिटानो रङ्गशालामा भएको फाइनल खेल सुरु भएको दोश्राे मिनेटमै विवादास्पद पेनाल्टी गोलमार्फत लिभरपुलले टीमकाे लागि अग्रता लिएको थियो ।

खेलको पहिलो मिनेटमै टोटनह्यामका मोउसा सिसिकोले बक्सभित्र ह्याण्ड गरेपछि स्लोभेनियाका रेफ्री दामिर स्कोमानियाले लिभरपुललाई पेनाल्टीको अवसर दिएका थिए । साडियो मानेले एकदमै चलाखीपूर्वक प्रहार गरेको बल सिसिकोको छातीमा लागेर हातमा छुँदै भुइँमा खसेको थियो ।

टोटनह्यामका खेलाडीले अपिल गरे पनि रेफ्रीले भारमार्फत आफ्नो निर्णयलाई परिवर्तन गरेनन् । पेनाल्टीमा मोहम्मद सालाहले लेफ्ट फुटेट शर्टमार्फत उत्कृष्ट गोल गरी दोश्राे मिनेटमै अग्रता दिलाएका हुन् ।

च्याम्पियन्स लिग फाइनलमा छिटाे गोल गर्ने सालाह दोश्राे फुटबलरसमेत बनेका छन् । यसअघि सन् २००५ को फाइनलमा एसी मिलानका पाउलो माल्दिनीले लिभरपुलविरुद्ध ५० सेकेण्डमै गोल गरेका थिए । दोश्राे हाफको अन्त्यतिर सब्सिच्युड खेलाडी डिभोक ओरिगीले पेनाल्टी एरियाबाट उत्कृष्ट गोल गरी लिभरपुललाई उपाधि सुरक्षित गरेका थिए ।

उनले जोयल माटिपको पासमा गोल गरेका हुन् । पहिलो पटक च्याम्पियन्स लिगको फाइनलमा पुगेको टोटनह्यामले खेल आफ्नो नियन्त्रणमा राखे पनि गोल गर्न भने सकेन । पहिलो हाफको तुलनामा दोश्राे हाफमा सुधारिएको प्रदर्शन गरेको टोटनह्यामका लागि सन ह्युङ मिन, ह्यारी केन र डेले अलीले पाएका अवसर सदुपयोग गर्न सकेनन् ।

लिभरपुलका प्रशिक्षक जर्गेन क्लपले दोश्राे प्रयासमा च्याम्पियन्स लिगको उपाधि दिलाए । सन् २०१५ मा लिभरपुलको प्रशिक्षक नियुक्त भएपछि लिभरपुलले जितेको एक मात्र ठूलो उपाधि यहीँ नै हो । यहीँ सिजन प्रिमियर लिगमा ९७ अंक जोडे पनि लिभरपुलले उपाधि दौडमा म्यानचेस्टर सिटीलाई पछि पार्न सकेको थिएन ।

लिभरपुलले यसअघि सन् १९७७, १९७८, १९८४ र २००५ मा च्याम्पियन्स लिग उपाधि जितिसकेकाे थियाे ।