काठमाडाैं, असार १ ।
कोपा अमेरिका–२०१९ मा लियोनल मेस्सी नेतृत्वको अर्जेन्टिना पहिलो खेलमै पराजित हुन पुगेकाे छ । समूह चरणअन्तर्गत आज बिहान भएको खेलमा अर्जेन्टिना कोलम्बियासँग २ विरुद्ध शून्य गाेलले पराजित हुन पुगेकाे हो । खेलको ७० औँ मिनेटसम्म गोल नगरे पनि गोलसमेत नखाएकाे अर्जेन्टिनाकाे लागि त्यसपछिको समय भने दुःखदायी बन्न पुगेकाे थियाे ।

७१ औँ मिनेटमा रोजर मार्टिनेजले गोल गर्दै कोलम्बियालाई सुरुवाती अग्रता दिलाएका हुन् । ८६ औँ मिनेटमा डुवन जापाताले गोल गर्दै अग्रता दोब्बर पारेपछि कोलम्बियाको २ विरुद्ध शून्य गाेलको जित निश्चित हुन पुगेकाे हाे । विश्वका उत्कृष्ट खेलाडीहरू मेस्सी तथा सर्जियो अग्युरोसहितको टीम रहे तापनि अर्जेन्टिनाले सुरुवात राम्रो गर्न सकेन ।

कोपा अमेरिकामा यसपटक प्रतिस्पर्धा गरिरहेका १२ टीम तीन समूहमा विभाजित रहेका छन् । समूह ‘ए’ मा आयोजक ब्राजिलसहित बोलिभिया, भेनेजुएला र पेरु, समूह ‘बी’ मा अर्जेन्टिना, कोलम्बिया, पाराग्वे र कतार तथा समूह ‘सी’ मा उरुग्वे, इक्वेडर, जापान र चिली रहेका छन् । यीमध्ये जापान र कतार आमन्त्रित टीम हुन् । यसैबिच, समूह ‘ए’ अन्तर्गत आजै बिहान भएको अर्को खेलमा भेनेजुएला र पेरुले गोलरहित बराबरी खेल खेलका थिए ।