काठमाडाैं, भाद्र ११ ।
भारतमा जारी रहेकाे साफ यू–१५ अर्थात पन्ध्र वर्षमुनिकाे च्याम्पियनशीप फुटबल प्रतियोगिताको फाइनलमा पुग्न नेपाललाई भुटानविरुद्धको खेल जित्नै पर्ने दवाब परेकाे छ । भारतको कल्याणी रङ्गशालामा भोलि बिहीबार हुने अन्तिम लिग खेलमा नेपालले भुटानलाई हराएकाे खण्डमा मात्र फाइनलमा पुग्न सफल हुनेछ । त्यस्तै मंगलबार भएको खेलमा नेपालले साविक बिजेता बङ्गलादेशलाई ४–१ गोलअन्तरले पराजित गर्दै अङ्क तालिकाको दोश्राे स्थानमा उक्लिएको थियो ।

नेपाल र बङ्गलादेशको समान ६/६ अङ्क रहेकाे छ तर, नेपाल हेड टू हेडको आधारमा बङ्गलादेशभन्दा अगाडि रहेकाे छ । बङ्गलादेश अङ्क तालिकाको तेश्राे स्थानमा रहेकाे छ । त्यसैगरी, भारत ९ अङ्कका साथ अङ्क तालिकाको शीर्ष स्थानमा कायम रहेकाे छ । श्रीलङ्का ३ अङ्कका साथ चौथो स्थानमा छ भने अङ्कविहीन रहेको भुटान अन्तिम स्थानमा परेकाे छ ।

भोलि नै हुने अर्को खेलमा भारतले बङ्गलादेशसँग प्रतिस्पर्धा गर्नेछ । नेपालले भुटानलाई पराजित गरे फाइनल पुग्ने सम्भावना लगभग पक्का हुनेछ भने यदि बङ्गलादेशले भारतलाई फराकिलो अन्तरले पराजित गरेमा गोलअन्तरमा नेपाल पछाडि पर्ने सम्भावना रहेकाे छ । प्रतियोगितामा नेपालसहित बङ्गलादेश, भारत, श्रीलङ्का र भुटान सहभागी रहेका छन् ।