काठमाडाैं, भाद्र २८ ।
नेपाल ओलम्पिक कमिटीको अध्यक्षमा जीवनराम श्रेष्ठ निर्वाचित भएका छन् । आज भएको मतदानमा जीवनरामले १७ मत प्राप्त गरेका छन् भने उनका प्रतिद्वन्द्वी उमेशलाल श्रेष्ठले १० मत प्राप्त गरेका थिए ।

जीवनराम र उमेशलालबीच अघिल्लो कार्यकालमा पनि प्रतिस्पर्धा हुँदा जीवनराम नै विजयी भएका थिए । योसँगै जीवनराम ओलम्पिक कमिटीमा दुई कार्यकाल निर्वाचित भएका छन् । जीवनरामकै प्यानलबाट महाचिवमा निलेन्द्रराज श्रेष्ठ पनि निर्वाचित भएका छन् ।

पाँच जना उपाध्यक्षमा ज्योती राणा २६ मतसहित विजयी हुँदा चतुरानन्द राज वैद्यले २२, तेजबहादुर गुरुङले २०, सुनिलकुमार श्रेष्ठ १८ तथा अशोकरत्न बज्राचार्यले १५ मत ल्याएर विजयी भएका छन् ।

उपाध्यक्षमा उम्मेदवारी दिएका मुश्लिम आयोगका अध्यक्ष समिम मिया अन्सारी पराजित भएका छन् । समिमले १२ मत मात्र प्राप्त गरे भने समिमसँगै राजीव श्रेष्ठ र पुष्पदास श्रेष्ठ ११–११ मत ल्याएर पराजित भएका थिए ।