काठमाडौं, असोज ९ ।
काठमाडौंको त्रिपुरेश्वरस्थित राष्ट्रिय खेलकुद परिषद्को कभर्ड हलमा आयोजित ‘अन्नपूर्ण पोष्ट कर्पाेरेट र एक्जिक्यूटिभ ओपन ब्याडमिन्टन टुर्नामेन्ट’ मा नेपाल राष्ट्र बैंकबाट ‘ख’ वर्गको इजाजत प्राप्त बैंक कामना सेवा विकास बैंक लिमिटेडले एकल र संयुक्त दुबैतर्फ जित हासिल गरेको छ ।

यहीँ असोज ६ गतेदेखि १२ गतेसम्म सञ्चालन भएको उक्त प्रतियोगितामा एकलतर्फ कामना सेवा विकास बैंकका दीप शाखाका शाखा प्रमुख विशाल खड्का र संयुक्ततर्फ विशाल खड्का एवं विश्वास नेपालले जित हासिल गरेका हुन् । प्रतियोगिताका हालसम्मका छ वटै संस्करणमा बिजेता रहेका विशालले फाइनलमा ज्योति विकास बैंकका विकास महर्जनलाई २१–१२ र २१–१३ को सजिलो सेटमा पराजित गर्न सफल भएका थिए । बिजेता कर्मचारीहरूलाई कामना सेवा विकास बैंकले केन्द्रीय कार्यालय ज्ञानेश्वरमा बधाईसहित सम्मान गरेका थिए ।