काठमाडाैं, बैशाख २७ ।
काठमाडाैंबाट पोखरा गएकी एक महिलामाथि बियर खुवाएर तीन जनाले सामूहिक बलात्कार गरेकाे घटना बाहिरीएकाे छ ।

पोखराको अमरसिंहचौरमा कास्कीको मादी निवासी तीन व्यक्तिले एक महिलालाई बियर खुवाएर सामूहिक बलात्कार गरेका हुन् ।

काठमाडौंबाट पोखरा गएकी ती महिलामाथि मादी गाउँपालिका वडा नम्बर-९ घर भई पोखरा-१० अमरसिंहचोक बस्ने ३६ वर्षीय चन्द्रबहादुर थापा, मादी गाउँपालिका-१२ भगवतीटार निवासी २९ वर्षीय विनोद परियार र मादी गाउँपालिका-१२ भगवतीटार निवासी ३८ वर्षीय कृष्ण रानाभाटले सामूहिक बलात्कार गरेको कास्की प्रहरीले जनाएको छ ।

उनीहरूले ती महिलालाई सुरुमा पोखरा अमरसिंहचौरमा रोकि राखेको ग. १ ख ६५९५ नम्बरको बसमा लगेर ललाई-फकाई बियर खुवाएको प्रहरीको भनाई रहेकाे छ । त्यसपछि पालैपालो करणी गरेको प्रहरीले बताएको छ ।

बलात्कार आरोप लागेका तीन जनालाई नै कास्की प्रहरीले पक्राउ गरेको छ । उनीहरूलाई बिहान ४ बजेको समयमा बलात्कार गरिरहेको अवस्थामा प्रहरीको सीआरभी टोलीले पक्राउ गरेको कास्कीका प्रहरी प्रवक्ता प्रहरी नायब उपरीक्षक (डीएसपी) बसन्तकुमार शर्माले जानकारी दिएका छन् ।

‘बसमा शंका लागेर खानतलासी गरेका रहेछन् प्रहरी साथीहरूले’, डीएसपी शर्माले भने, ‘बसभित्र हेर्दा महिलालाई नाङ्गै देखेपछि केरकार गर्दा सामूहिक बलात्कार भन्ने खुल्यो ।’

उनीहरूलाई सीआरभी टोलीले तत्कालै नियन्त्रणमा लिएर वडा प्रहरी कार्यालय रामबजारलाई बुझाएको शर्माले जानकारी दिए । पक्राउ परेका तीनै जनालाई जिल्ला अदालत कास्कीमा उपस्थित गराई सामूहिक जबरजस्ती करणीसम्बन्धी मुद्दामा ७ दिन म्याद थप गरी अनुसन्धान अगाडि बढाइएको डीएसपी शर्माले बताएका छन् ।

घटनासम्बन्धी थप विवरण आउन केही समय लाग्ने प्रहरीले जनाएकाे छ ।