काठमाडाैं, जेठ १ ।
बेलायत पठाउँछु भनेर ४१ लाख रुपैयाँ ठगी गरेकाे अभियाेगमा प्रहरीले एक जना युवकलाई पक्राउ गरेको छ । पक्राउ पर्नेमा बझाङको बुंगल नगरपालिका-२० घर भई हाल कीर्तिपुर नगरपालिका बस्ने योगेन्द्र बागः रहेका छन् ।

२३ वर्षीय बागःलाई कीर्तिपुरबाट पक्राउ गरिएको उपत्यका अपराध अनुसन्धान कार्यालयका एसपी रविन्द्र रेग्मीले जानकारी दिएका छन् ।

सामाजिक सञ्जाल फेसबुकमा ‘निशा टुर्स लिमिटेड’ नामको आईडीमार्फत् कुरा गरेर उनले पीडितहरूलाई बेलायतमा वर्किङ्ग भिसामा पठाउने सपना देखाएर रकम असुलेका हुन् । रु. ४१ लाख १५ हजार असुलेपछि उनी सम्पर्क विहीन भएको एसपी रेग्मीले जानकारी दिएका छन् । उनलाई ठगी मुद्दामा कारबाही गर्न अपराध अनुसन्धान कार्यालयले जिल्ला प्रहरी परिसर टेकुमा पठाएको छ ।