काठमाडाैं, माघ २३ ।
फैसला कार्यान्वयन गर्ने अभियानअन्तर्गत जिल्ला प्रहरी कार्यालय पर्सा तथा मातहतका युनिटहरूले ३० जना फरार प्रतिवादीहरूलाई पक्राउ गरेको छ ।

जिल्ला प्रहरी प्रमुख एसपी गौतम मिश्रको निर्देशनमा जारी अभियानअन्तर्गत जिल्लाको छुट्टाछुट्टै स्थानबाट प्रहरीले ३० जना फरार प्रतिवादीहरूलाई पक्राउ गरेको हो ।

एसपी मिश्रले जिल्ला प्रहरी प्रमुखको रूपमा पदभार सम्हालेसँगै विभिन्न अपराधमा दण्ड सजाँय पाएर फरार रहेका प्रतिवादीहरूलाई प्रहरीले धमाधम पक्राउ गर्न थालेको हो ।

प्रहरीले गत शनिबारदेखि सोमबारसम्म ३ दिनमा ३० जना फरार प्रतिवादीहरूलाई पक्राउ गरी आवश्यक कारबाहीको लागि जिल्ला अदालत पर्सामा उपस्थित गरिएको जिल्ला प्रहरी प्रवक्ता डीएसपी किशोर लम्सालले बताएका छन् ।

प्रहरी प्रमुख एसपी मिश्र आएदेखि नै पर्सा प्रहरीले फरार प्रतिवादी पक्राउसँगै तस्करी नियन्त्रणमा जोडसमेत दिएको छ ।