काठमाडाैं, फागुन १३ ।
विष सेवन गरेर अचेत अवस्थामा भेटिएका वागमती प्रदेशका सहकारी तथा गरिबी निवारणमन्त्री मदुकुमार श्रेष्ठका स्वकीय सचिव रवि थापाको मृत्यु भएको छ ।

उनी सोमबार काठमाडौंको कलंकीस्थित साथीको कोठामा अचेत अवस्थामा भेटिएका थिए । अचेत भेटिएका उनलाई उद्धार गरी कलंकीस्थित शहीद मेमोरियल अस्पतालमा लगिएकोमा उपचारको क्रममा मृत्यु भएको हो ।

थापाको केही दिनअघि पैसा बार्गेनिङ गरेको अडियो सार्वजनिक भएको थियो । सुमेरु सहकारीका पूर्वसचिवसमेत रहेका विनोद आचार्यसँग सहकारीको समस्या मिलाइ दिने भन्दै १० लाख बार्गेनिङ गरेको अडियो बाहिरिएपछि उनले विषय सेवन गरेको बताइएको छ ।

जिल्ला प्रहरी परिरसर काठमाडौंका प्रवक्ता अपिलराज बोहोराले सुसाइड नोट लेखेर उनले विष सेवन गरेको बताए । उनले सुसाइड नोटमा आर्थिक कारोबारको बारेमा लेखिएको जानकारी दिएका छन् ।

बोहोराकाअनुसार थापाकाे शवलाई पोष्टमार्टम गरिँदै छ ।