काठमाडौं, फागुन १६ ।
विश्व कीर्तिमानी पर्वतारोही पूर्णिमा श्रेष्ठ नेपालस्थित फ्रान्सेली दूताबासको ‘सद्भावना दूत’ मा नियुक्त भएकी छन् ।

आगामी ३ जुनमा अन्नपूर्ण प्रथम हिमालको पहिलो सफल आरोहणको ७५ औँ वार्षिकोत्सव मनाउने सिलसिलामा श्रेष्ठलाई सद्भावना दूत नियुक्त गरिएको फ्रान्सेली दूताबासले जनाएको छ ।

सद्भावना दूत नियुक्त भएपछि श्रेष्ठले अन्नपूर्ण हिमाल सम्बन्धमा दूताबासले आयोजना गर्ने विभिन्न कार्यक्रममा सहभागी हुने, अन्नपूर्ण हिमालसम्बन्धी तस्वीर प्रदर्शनी गर्ने, अन्नपूर्ण हिमालसम्बन्धी कथा वाचन गर्नेलगायत काम गर्ने बताएकी छन् ।

पर्वतारोहणको गौरवशाली इतिहासलाई सम्मान गर्दै, वातावरणीय संरक्षण र दीगो पर्वतीय पर्यटन प्रबर्द्धन गर्ने यात्रामा सँगै रहन पाउँदा गर्व लागेको उनले बताइन् ।

‘हिमालहरू हाम्रो साहस मात्र होइन, प्रकृति र भविष्यका लागि जिम्मेवारी पनि हुन्,’ उनले भनिन् ।

श्रेष्ठले अन्नपूर्ण हिमालको पनि सफल आरोहण गरिसकेकी छन् ।