काठमाडाैं, फागुन २१ ।
राष्ट्रिय प्रजातन्त्र पार्टी (राप्रपा) का प्रमुख सचेतक ज्ञानबहादुर शाहीले सरकारले नेपाल विद्युत प्राधिकरणका कार्यकारी निर्देशक कुलमान घिसिङलाई पदबाट नहटाउन सरकारलाई चेतावनी दिएका छन् ।

प्रतिनिधि सभाको आज बुधबारको बैठकमा बोल्दै सांसद् शाहीले कार्यकारी निर्देशक घिसिङलाई हटाए सरकारविरुद्ध सडक र सदनबाट विरोध गर्ने चेतावनी दिएका हुन् । उनले सरकारले कुलमानलाई हटाएर मुलुकलाई अन्धकारतिर धकेलिरहेको बताए ।

“कुलमान घिसिङलाई हटाउने जुन प्रपञ्च गरिँदै छ, मन्त्रिपरिषद्को निर्णय हुँदैछ भन्ने सुन्नमा आएको छ । यदि कुलमान घिसिङलाई हटाइयो भने नेपाललाई अन्धकारतिर धकेलेको भनेर सडक र सदन दुबै ठाउँबाट आवाज उठ्छ,” उनले भने ।

उनले दशरथ रंगशाला केपी ओली कपको समापन समारोहमा दर्शक कुट्ने आयोजकलाई कारबाही गर्नसमेत सरकारको ध्यानाकर्षण गराउँदै प्रधानमन्त्रीको आलोचना गर्दैमा मान्छे कुट्न नपाइने उनको भनाई छ ।