काठमाडाैं, फागुन २५ ।
पूर्वराजा ज्ञानेन्द्र शाहको पक्षमा आज आइतबार काठमाडौंमा व्यापक प्रदर्शनकाे तयारी भइरहेकाे छ । राप्रपाको आह्वानमा राजतन्त्र पुनःस्थापना पक्षधरहरूले आज काठमाडौंमा प्रदर्शन गर्ने तयारी गरेका हुन् ।

पोखरामा रहेका पूर्वराजा शाह आज काठमाडौं फर्किँदै छन् । उनको स्वागतका साथै राजतन्त्रका पक्षधरहरूले त्रिभुवन अन्तर्राष्ट्रिय विमानस्थलमा प्रदर्शन गर्दैछन् । दिउँसो करिब ३ बजे शाह काठमाडौं फर्किने तयारी रहेकाे छ ।

सोहीअनुसार प्रहरीले काठमाडौंको सुरक्षा व्यवस्था थप कडा पारेको छ । ‘साबिकको भन्दा धेरै १२-१३ सयको संख्यामा आज प्रहरी खटाइएको छ,’ प्रहरी परिसर काठमाडौंका प्रवक्ता अपिलराज बोहराले भने, ‘सोही अनुपातमा अन्य सुरक्षा फोर्स पनि खटाइने तयारी रहेकाे छ ।’

राजतन्त्र पुनःस्थापना पक्षधरहरूको गतिविधिले सत्तामा रहेका दुई दल कांग्रेस र एमालेले पनि आन्तरिक छलफललाई तीब्रता दिएका छन् ।

उनीहरूले राजावादीहरूको गतिविधिलाई कसरी निस्तेज पार्न सकिन्छ र सरकारको भूमिका कस्तो बनाउने भन्ने विषयमा बालुवाटार केन्द्रित छलफल गरिरहेका छन् ।