काठमाडाैं, चैत २ ।
काठमाडौं महानगरपालिका-३२ तीनकुने गैरीगाउँ पेट्रोल पम्प अगाडि आज शनिबार बिहान भएको मोटरसाइकल दुर्घटनामा परी एक जनाको मृत्यु भएको छ ।

बिहान करिब साढे ४ बजे प्र. ३-०२-००३ प ६२४५ नम्बरको मोटरसाइकललाई टिपरले ठक्कर दिंँदा मोटरसाइकलमा सवार काभ्रे पनौती नगरपालिका-११ घर भई हाल ललितपुर धापाखेल बस्ने वर्ष २६ का सुकराम तामाङको मृत्यु भएको जिल्ला प्रहरी परिसर काठमाडौंका प्रवक्ता, प्रहरी उपरीक्षक अपिलराज बोहराले जानकारी दिए ।

उपचारका क्रममा बिहान साढे ५ बजे ट्रमा सेन्टरमा उनको मृत्यु भएको हो । टिपर चालकलाई नियन्त्रणमा लिइएको एसपी बोहराले बताए ।

सोही दुर्घटनामा मोटरसाइकलमै सवार काभ्रे बेथानचोकका रमेश तामाङ घाइते भएको र उनको ट्रमा सेन्टरमा उपचार भइरहेको प्रहरीले जनाएको छ ।