काठमाडौं, चैत ३ ।
सहकारी ठगीमा फरार रहेका हिराखुसी बचत तथा ऋण सहकारी संस्थाका अध्यक्ष श्याम श्रेष्ठ भन्ने सोमप्रसाद श्रेष्ठ पक्राउ परेका छन् ।

बचतकर्ताको २ करोड ८१ लाख ४३ हजार ९ सय ५३ रुपैयाँ ठगेर फरार भएका श्रेष्ठलाई काठमाडौं उपत्यका अपराध अनुसन्धानले नयाँ बानेश्वरबाट पक्राउ गरी थप अनुसन्धान तथा आवश्यक कारबाहीको लागि प्रहरी वृत्त सिंहदरबारमा पठाएको छ ।

काठमाडौं जिल्ला अदालतबाट सहकारी ठगीसम्बन्धी कसुर मुद्दामा पक्राउ पुर्जी जारी भई फरार चितवन जिल्ला भरतपुर महानगरपालिका-२१ रंगिलाका ६३ वर्षीय श्रेष्ठ हाल काठमाडौं महानगरपालिका-२९ घट्टेकुलो बस्दै आएका थिए ।

हिराखुसी बचत तथा ऋण सहकारी संस्थाका अध्यक्षसहित ८ जना बचतकर्ताको बचत रकम ठगेर फरार भएका थिए । अझै ६ जना फरार रहेका छन् ।

बचतकर्ताको पैसा फिर्ता नगरी भाग्नेमा सहकारीका सचिव उदयपुर जिल्ला कटारी नगरपालिका-४ का होमप्रसाद निरौला, सहकारीका कोषाध्यक्ष सुनसरी जिल्ला ईटहरी उपमहानगरपालिका-८ का गणेश अधिकारी रहेका छन् ।

सहकारीका सञ्चालक समिति सदस्य स्याङजा जिल्लाको आँधीखोला गाँउपालिका-३ की ईन्दिरा केसी, सञ्चालक समिति सदस्य काठमाडौं महानगरपालिका-२८ की दिया मास्के, सहकारीका सञ्चालक ओखलढुङ्गा साबिकको ज्यामिरे गाविस-५ का प्रदिप कुमार खड्का, सहकारीको सञ्चालक काठमाडौं महानगरपालिका-३२ का मनिक रत्न स्थापित र काठमाडौं महानगरपालिका-३३ बस्ने सहकारीका सञ्चालक सिता श्रेष्ठ फरार रहेका छन् ।