काठमाडाैं, चैत ४ ।
मोरङको रंगेलीमा आज सोमबार दिउँसो एक जना युवाले आफ्नै बाबुमाथि चक्कु प्रहार गरेका छन् ।

चक्कु प्रहारबाट वृद्ध बुबाको अवस्था गम्भीर रहेकाे छ । मोरङ प्रहरीका प्रवक्ता डीएसपी वेदप्रकाश जोशीले रंगेली नगरपालिका-७ का ३५ वर्षीय अशोक चौधरीले बुबा ६१ वर्षीय चन्देश्वर चौधरीलाई सोमबार दिउँसो ४ बजेतिर चक्कु प्रहार गरेको जानकारी दिएका छन् ।

उनकाअनुसार घरायसी विवादका क्रममा छोराले बाबुमाथि चक्कु प्रहार गरेको प्रारम्भिक अनुसन्धानबाट खुल्न आएकाे छ । कस्तो खालको घरायसी विवाद हो भन्ने प्रहरीले प्रस्ट भने पारेकाे छैन ।

छोराले चक्कु प्रहार गर्दा चन्देश्वरको टाउको र शरीरका विभिन्न भागमा गहिरो चोट लागेको छ । विराटनगरको नोबेल शिक्षण अस्पतालमा उपचाररत् उनको अवस्था गम्भीर रहेको डीएसपी जोशीले बताएका छन् ।

उनकाअनुसार बुबालाई चक्कु प्रहार गर्ने अशोकलाई चक्कुसहित पक्राउ गरिएको छ । साे घटनाको सम्बन्धमा थप अनुसन्धान जारी रहेकाे डीएसपी जाेशीले जानकारी दिएका छन् ।