काठमाडाैं, चैत ७ ।
पूर्वराष्ट्रपतिद्वय डा. रामवरण यादव र विद्यादेवी भण्डारीले भ्रष्टाचारजन्य कार्य गरिरहेको भन्दै अख्तियार दुरूपयोग अनुसन्धान आयोगमा उजुरी परेको छ ।

पूर्वराष्ट्रपति यादवको काठमाडौंमा आफ्नै सुविधा सम्पन्न घर हुँदाहुँदै भाडाको घरमा बसेर राज्यलाई मासिक १ लाख ९२ हजार भाडा तिर्न लगाएको उजुरीकर्ताको दाबी रहेकाे छ ।

पूर्वराष्ट्रपति यादवले आफ्नो घर भने भाडामा लगाएको उनको दाबी छ ।

त्यस्तै, उजुरीकर्ताले उजुरी पत्रमा उल्लेख गरेअनुसार पूर्वराष्ट्रपति भण्डारी भने काठमाडौंको चपली हाइटमा आफ्नै घरमा बसिरहेको तर, उनले मासिक १ लाख रुपैयाँ भाडा सरकारबाट लिइरहेकाे दाबी छ । आफ्नै घरमा बसेर घर भाडा बापतको रकम लिनु भ्रष्टाचारजन्य कार्य रहेको उजुरीकर्ताको दाबी छ ।

उजुरी कर्ता युवराज पौडेलले पूर्वराष्ट्रपतिद्वयलाई तत्काल पक्राउ गरी अनुसन्धान अगाडि बढाइनु पर्ने, घरभाडा बापत गैरकानूनी रूपमा लिइएको रकम फिर्ता गराइनुपर्ने र कानूनबमोजिमको कारबाहीसमेत गरिनुपर्ने माग राखिएको छ ।

उजुरीमा पूर्वराष्ट्रपति यादव र भण्डारीलाई भ्रष्टाचार कसुरमा पक्राउ गरी छानबिन गर्न उजुरीमा माग गरिएको छ। अन्यथा मुद्दा लिएर अदालतसम्म जाने उजुरीमा  उल्लेख गरिएकाे छ ।