बर्दिया, माघ २७ ।
‘स्वास्थ्यका लागि खेलकुद, राष्ट्रका लागि खेलकुद’ भन्ने नारासहित अन्तर माध्यमिक विद्यालय राष्ट्रपति रनिङ शील्ड खेलकुद प्रतियोगिताको नवौँ संस्करण बर्दियाको पदनाहमा रहेको पाञ्चजन्य माध्यमिक विद्यालयमा बुधबारदेखि सुरु भएको छ ।

राष्ट्रपति रनिङ शील्ड खेलकुद प्रतियोगिता नेकपा (एमाले) का उपाध्यक्ष एवं पूर्वउपप्रधानमन्त्री वामदेव गौतमले उद्घाटन गरेका थिए ।

प्रतियोगिताको उद्घाटन गर्दै उपाध्यक्ष गौतमले खेलकुद स्वास्थ्यका लागि मात्र नभई देशकै प्रतिष्ठाको विषय भएकाले सक्षम खेलाडी उत्पादन गर्न विद्यालय नै उत्तम रहेको बताए । खेलकुद क्षेत्रले स्थानीय क्षेत्रको मात्र नभई देशलाई अन्तर्राष्ट्रिय स्तरमा नै चिनाउने भएकाले खेलकुद क्षेत्रको विकासमा सबै जना एकजुट हुनुपर्नेमा जोडसमेत दिएका छन् ।

जिल्ला शिक्षा कार्यालय बर्दियाका निमित्त जिल्ला शिक्षा अधिकारी नीलकण्ठ रेग्मीले प्रत्येक वर्ष आयोजना भइरहेको प्रतियोगिताले खेलाडी उत्पादन गर्नमा सहयोग पुग्ने बताए । प्रतियोगिताको औपचारिक खेल भने आजदेखि सुरु हुनेछ । प्रतियोगितामा बर्दियाका ७० वटा सरकारी तथा निजी विद्यालयको सहभागिता रहेको छ ।

प्रतियोगितामा भलिबल, कबड्डी, दौड, रिले दौड, हाइजम्प, लङ्गजम्प, सटफुट, कराँते तेक्वाण्दो, उसु खेलमा छात्र–छात्रा गरी करिब दुई हजार पाँच सय खेलाडीको सहभागिता रहने जिल्ला खेलकुद विकास समितिका अध्यक्ष खगेन्द्र खनालले जानकारी दिए ।

जिल्ला खेलकुद विकास समितिको आयोजना तथा पाञ्चजन्य मावि पदनाहाको सह–आयोजनामा सुरु भएको राष्ट्रपति रनिङ शील्ड खेलकुद प्रतियोगिता फागुन २ गतेसम्म सञ्चालन हुनेछ ।