काठमाडौं, पुस १७ ।
गएराति भएको प्रिमियर लिगअन्तर्गतको खेलमा म्यानचेष्टर सिटीलाई लिभरपुलले १ विरुद्ध शून्य गोलले पराजित गरेको छ । घरेलु मैदानमा एनफिल्डमा भएको उक्त खेलमा लिभरपुललाई ३ अंक दिलाउन जर्जिनिओ विजनाल्डमले गरेको गोल नै निर्णायक गोल हुन पुगेको हो ।

आठौँ मिनेटमै विज्नाल्डमले एडम लालानाको पासमा गरेको हेड गोल नै लिभरपुललाई जिताउन निर्णायक गोल साबित हुन पुगेको थियो ।

जितपछि १९ खेलबाट ४३ अंक जोडेको लिभरपुल दोश्रो स्थानमा रहेको छ । लिभरपुलले तेश्रो स्थानमा रहेको सिटीलाई ४ अंकले पछि पारेको छ भने शीर्ष स्थानको चेल्सीभन्दा ६ अंकले पछि रहेको छ ।

लगातार १३ प्रिमियर लिग खेल जित्दै आर्सनलको कीर्तिमान बराबरी गरेको चेल्सी आधा खेल सकिँदा ४९ अंकका साथ शीर्ष स्थानमा छ ।

१९ औँ चरणको अन्तिम दुई खेल हुँदैछन् । जसमा चौथो स्थानको आर्सनलले क्रिस्टल प्यालेससँग घरेलु मैदानमा खेल्नेछ भने पाँचौ स्थानको टोटनह्यामले वाटफोर्डको भ्रमण गर्नेछ ।