दृष्टिविहीन राईको ‘सम्झौताको डुङ्गाभित्र’ एल्बम विमोचन

काठमाडाैं, पुस १७ ।
दृष्टिविहीन रूपा राईको आधुनिक गीति एल्बम ‘सम्झौताको डुङ्गाभित्र’ बजारमा आएको छ । किराँत राई यायोक्खास्थित सुम्निमा हलमा वरिष्ठ सङ्गीतकार शान्तिराम राई, गायिका पार्वती राई र कवयित्री विमला तुम्खेवाले संयुक्त रूपमा एल्बम शनिबार विमोचन गरिएकाे हाे ।
सोही अवसरमा रचयिता राईले एल्बममा समेटिएका आठ वटा गीत आफूले विभिन्न समयमा लेखेको जानकारी दिँदै जीवनमा उकाली–ओराली गर्ने क्रममा मानिसका दुःख, पीडा र व्यथालाई समेटेर गीत तयार गरेको बताइन् ।
एल्बममा ‘सम्झौताको डुङ्गाभित्र’ टाइटल गीतसँगै ‘कैयौं समय’, ‘एकान्त यो’, ‘फर्केर नआई’, ‘खुसीले लेख्दा’, ‘अरूको भन्दा’, ‘खोज्दै नखोज’ र ‘मायाको सङ्घार’ बोलका गीत रहेकाे छ ।
यस्तै, एल्बममा कृष्णभक्त राई, अञ्जु पन्त, नरेन्द्र प्यासी, स्मृति शाही, राजेशपायल राई, श्रेया चेम्जोङ, सुन्दर लामा र कविता काफ्लेले स्वर दिएका छन् । रु. दुई सय ५० मूल्य तोकिएको सो एल्बम ज्योति केसी र किरण केसीको लगानीमा बजारमा ल्याइएकाे हो ।
प्रतिक्रिया